Ben Madilynn
LA UNION – Posible a lapdan ti Department of Justice iti plano ni dismissed Bamban Tarlac Mayor Alice a mangidatag ti Certificate of Candidacy tapno agpaibotos manen kas mayor iti nasao nga ili.
Kinumpirma ni Justice Secretary Jesus Crispin Remulla ti nasao a plano, ngem kinunana a lapdan da a tumaray manen iti sigud nga opisyal.
Immunan a kinumpirma ti kampo ni Alice Guo babaen ti abogado na a ni Atty. Stephen David a mangidatag ti kliyente na ti COC iti sumaruno a lawas.
Impaganetget iti kampo ni Guo, nga awan pay iti desisyon ti korte seknan iti citizenship ti kliyente da, isunga mabalinna pay ti tumaray.
Kabayatanna, mamati ni Remulla nga awan ti karbengan ni Alice Guo a kumiddaw ti re-election.
Immuna a nairaman ti nagan ni Guo iti ilegal nga operasyon ti POGO idiay Bamban, Tarlac ken maipagarop pay nga ispiya ti China.
Agtultuloy met ti panangilibak ni Guo a karaman iti ilegal nga operasyon ti POGO ken panagbalin nga espiya ti China.
Segun met iti Commission on Elections, awan ti bileg da tapno kanselaren iti COC ni Guo nangruna ket saan pay met a convicted kadagiti sangsangwenna a kaso.
