3 ka enforcer sa Lapu-Lapu City ‘nagpositibo’ sa illegal

Tulo sa 205 ka kawani sa Lapu-Lapu City Traffic Management System (CTMS) Office ang nagpositibo sa paggamit og ilegal nga druga atol sa usa ka random drug screening nga gihimo niadtong Dominggo, Hunyo 1, 2025.

Gikumpirmar ni Garry Lao, executive director sa City of Lapu-Lapu Office for Substance Abuse Prevention (Closap) sa SunStar Cebu nga usa ka traffic enforcer ang unang nagpositibo sa cannabis (marijuana), samtang duha ang nagpositibo sa methamphetamine hydrochloride (shabu). Matod ni Lao nga usa sa tulo ka kawani ang nikwestyon sa resulta.

Ang tulo ka kawani gipaubos sa confirmatory testing niadtong Lunes, Hunyo 2, samtang nagpaabot pa sa resulta.

Kon magpositibo ang resulta sa confirmatory test, ipatuman dayon ang pagtangtang sa trabaho tungod kay dili applicable ang suspensyon sa mga job order nga empleyado.

Giila ni CTMS head Mario Napuli ang tulo ka JO traffic enforcer nga nagpositibo sa ilegal nga druga nga nagpangidaron og 37 hangtod 40 anyos.

Matod niya nga kining mga kawani nagpakita og talagsaong pamatasan sa tiggamitan og druga.

Niingon siya nga nagpaabot na lang siya sa pormal nga mando gikan sa mga opisyal aron sa pagtangtang sa tulo.

Gipasidan-an ni Napuli ang iyang mga sakop nga likayan ang paggamit og druga kon nagmahal sila sa ilang trabaho. / DPC