Pam dedma sa electoral protest sa iyang kadaugan

Dili magpatarog si Cebu Governor-elect Pamela Baricuatro sa election protest ni outgoing Governor Gwendolyn Garcia batok sa iyang kadaugan.

Matod ni Baricuatro adunay mga abogado nga moatiman pagtubag sa giduso nga election protest ni Garcia.

“I have a team of lawyers and election experts already handling the matter. In due time, my legal counsel will address the case,” matod ni Baricuatro.

“At this point, I will no longer concern myself with the motivations behind Gwen’s filing of what is clearly a baseless and absurd protest,” dugang niya.

Bisan sa protesta nga giduso, dili na siya motubag pa sa maong isyu apan mangandam sa iyang pagsugod sa panerbisyo sa Lalawigan sa Sugbo.

“I will not allow myself to be distracted from the more important task of governance, as my team and I prepare to take over the reins of the Provincial Capitol. As your people’s governor, my focus will concentrate on how best to deliver the kind of social services the people of Cebu so rightfully deserve.”

Ang Commission on Elections (Comelec) pinaagi sa Electoral Contests Adjudication Department niluwat og summon batok ni Baricuatro, nagmando kaniya sa pagtubag sa giduso nga electoral protest ni Garcia.

Si Baricuatro gimanduan pagsumiter sa verified nga tubag sa Electoral Contests Adjudication Department sulod sa lima ka adlaw.

Giduso ang maong protesta sa buhatan sa Comelec sa Mayo 23 nga nagkuwestiyon sa resulta sa gubernatorial race sa Lalawigan sa Sugbo. / ANV