2 Taiwanese, 29 Pinoy nga ‘scammers’, sikop

Duha ka mga Taiwanese nationals ug 29 ka mga Pinoy ang nasikop sa National Bureau of Investigation (NBI) 7 tungod sa giingong online scamming activities niini sa usa ka subdivision sa Barangay Mactan, Dakbayan sa Lapu-Lapu sa Hunyo 4, 2025.

Si NBI Director Jaime Santiago nimando sa NBI 7 pag-serve sa tulo ka warrants, pag-search, pag-seize ug examine sa mga computer data nga gi-isyu ni Judge Ramon Daomillas, Jr. sa RTC 11.

Unang nasikop ang duha ka mga langyaw nga nailhan nga sila si Tsai Chit Ting ug Liu Cheng Chi.

Giingong nilanat na sulod sa usa ka tuig ang modus sa maong mga langyaw diin nagkadaiyang dating sites sama sa Filipino Cupid ug uban pa ang gigamitan og peke nga mga profile accounts.

Nigamit sab sila sa nagkadaiyang social media accounts sama sa Facebook, Whats Up, Instagram ug Telegram gamit sab ang peke nga accounts aron linglahon ang mga user.

Nasuta nga aduna silay fake shop accounts nga magpakaaron-ingnon nga namaligya og mga produkto apan walay moabot nga delivery sa nipalit.

“The victims would only realize that they have been defrauded when there is no delivery of goods,” asoy sa NBI 7.

Lakip sa nadakpan nag-edad og 21-anyos ngadto sa 34-anyos nga gikan sa nagkadaiyang lugar sa Pilipinas.

Nakuha gikan sa panimalay nga gihimuan sa ilegal nga kalihukan ang computers nga gigamit sa pagpang-scam.

Ang mga dinakpan mag-atubang og kasong may kalapasan sa Sec. 4 (b)(2) Computer related fraud ubos sa RA No. 10175 o Cybercrime Prevention Act of 2012 ug gitugotan silang makapyansa og di mominos P200,000.

Sa Hunyo 5, 2025, napaubos na sa inquest proceedings sa Lapu-Lapu Prosecutor’s Office ang mga suspek. / ANV