Ex-veteran Senator Gringo Honasan, kumandidato manen pagka-Senador inton 2025 elections
Ben Madilynn
Padasen manen ti beterano a Senador a ni Gregorio “Gringo” Honasan ti agkandidato a kas Senador inton 2025 midterm elections.
Iti maysa a statement, inwaragawag ti sigud a Senador nga ipila na ti kandidaturana inton Lunes, Oktubre 7 babaen ti Reform Party wenno Partido Reporma.
Kinuna ni Honasan a no mabutosan manen iti Senado ket ikarina nga itandudo ti pannakapasa ti baro nga Armed Forces of the Philippines (AFP) Modernization Program Law.
Segun iti beterano, ti agdama nga modernization program ti AFP ket naituding nga agpatingga inton tawen 2027 ken innayon na a kasapulan ti baro a linteg tapno maituloy dagiti proyekto a nairanta a mangpapigsa pay iti defence capabilities ti Pilipinas.
Imbatad ni Honasan, a dati met a chairperson ti Senate Committee on National Defense and Security a nasken a maituloy daytoy nangruna ita a kumarkaro ti tension idiay West Philippine Sea.
Maipalagip a maysa ni Ex-Senator Honasan kadagiti nangipasdek iti Reform the Armed Forces Movement nga addaan iti nagpateg nga akem idi 1986 People Power Revolution.
Nagserbi pay isuna kas sekretario ti Department of Information and Communications Technology (DICT) iti sidong ti administrasion ni Duterte ken sigud pay a Philippine Army colonel.
Ni Honasan pay ti kaunaan nga independent candidate iti pakasaritaan ti Pilipinas a nangabak kas Senador idi damo a simrek iti politika idi tawen 1995.
