P10K nga balor sa t-shirt gi-shoplift, nasakpan

GIPUSASAN ang nagpakaaron-ingnon nga shopper human nasakpan nga wala mobayad sa mga pinili nga t-shirts sulod sa usa ka deparment store sa Colon, Barangay Sto. Niño, Dakbayan sa Sugbo niadtong alas 8:50 sa gabii, Martes, Hunyo 3, 2025.

Ang nagtingkagol sa Waterfront Police Station 3 giila nga si Janjan, 21, taga Sitio Aroma, Barangay Subangdaku, Siyudad sa Mandaue.

Nakuha gikan kaniya ang walo ka mahalon nga t-shirts nga mokabat ang tanan sa P10,398.

Nabantayan ang suspek sa mga house detective nga namili sa maong mga t-shirt ug nilahos og gawas nga wala moagi sa kahera aron nga bayran. 

Wala magtuo si Janjan nga giatngan siya sa guwardiya ug gisusi ang sulod sa iyang bag ug nakuha ang gipang-shoplift.

Ang mga nakuha unta niya nga t-shirts iyang ibaligya sa ilang dapit sa Subangdako.

Kasong pagpangawat ang atubangon sa dinakpan  ug kasamtangan siya nga gitanggong sa Waterfront Police Station. / AYB