3-minute response time gipatuman na sa CCPO

GIHANGOP sa kapulisan sa Dakbayan sa Sugbo ang pagkatudlo sa bag-o nila nga PNP Chief nga si Police General Nicolas Torre III hulip sa niretiro na sa katungdanan nga si Police General Rommel Marbil.

Nipaabot og pahalipay si Police Colonel Enrico Figueroa kang Torre nga iyang gihulagway nga usa ka police official nga gusto og trabaho tungod kay kasagaran sa assignment niini naa sa operation.

Matod ni Figueroa nga dili na bag-o alang kaniya ang mga programa ni Torre sanglit nahimo niya kini nga hepe sa dihang nadestino sila sa Quezon City Police District.

Usa sa mga palisiya nga kanunay nga ipatuman ni Torre mao ang 3 minute response time sa bisan unsa nga alarma nga iya sab nga gihimo karon sa kapulisan sa Dakbayan sa Sugbo.

Kini nga palisiya gipanglantawan nga himuon sa bag-ong PNP Chief sa tibuok Pilipinas nga maoy hinungdan nga sila sa CCPO nangandam nang daan.

Gitahasan ni Figueroa ang Tactical Motorcycle Riding Unit ug ang Mobile Patrol Unit nga maoy unang motubag sa alarma sulod sa tulo ka minutos nga una na nila kini nga gipraktisan sa ilang gihimong simulation exercises.

“Trabaho naman po talaga natin yan ng ating kapulisan na manghuli nang kriminal so we will double our effort dito sa Cebu City and we will exhaust all our resources para yan po ay ating ma-comply”, matod ni Figueroa.

Lakip sa ilang pangandaman ang pagbisita unya ni Torre sa Central Visayas sanglit naanad na kini nga mosusi sa tanang unit sa kapulisan kon unsa sila kaandam.

Si Torre giingong mokalit lang og kuha og hand held radio aron manawag sa labing duol nga police station ug kinahanglan nga matubag dayon.

Samtang nipaabot sab sa ilang pahalipay ang Police Regional Office 7 pinaagi sa hepe niini nga si Police Brigadier General Redrico Maranan.

“The men and women of PRO 7 join me in extending our congratulations on the occassion of your appointment as the Chief PNP! As you take command, may your leadership be marked with excellence, justice and unwavering service and dedication to the people”, mensahe ni Maranan kang General Torre. / AYB