Karol Wojtyla / Papa Juan Pablo II

LAMBERTO G. CEBALLOS

Cawayan, Dalaguete, Cebu

Pebrero 19, 1981.

Gibalaan sa langit kining adlawa

Sa wagas nga tubig gikan sa panganod.

Ang dalisay nga taligsik mibenlita

Og daghang grasya sa among kasingkasing,

Mitipon ug misagol sa kainit sa Adlaw

Sa udtong tutok.

Nakita nimo ang among mga pahiyom

Diha sa ngaya namong mga nawong

Ug among gibati ang balaanong kahayag

Sa imong presensiya sa kinauyokan

Sa among mga kalag.

VIVA SANTO PAPA! singgit sa arko kanimo.

Apan karon wala na ang maong arko nga nagsaysay

Sa imong paghiabot. Mao na lay nagpabilin 

Ang kahaw-ang sa imong pagbiya.

Nahilabay ka sa among kinabuhi aron buhatan

Og taytayan ang kahaw-ang sa pagbati

Nga gihambin sa among katiguwangan

Sa nangaging kapin sa upat ka gatos

Nga katuigan.

Sa gihapon naghuwat kami sa imong pagbalik.

Apan wa ka na mobalik, ikaw nga nagsul-ob

Sa sapatos sa usa ka mananagat sa pagtuo.

Karon nasayod na kami: mipauli ka na diay

Sa balay sa imong Agalon gikan nga nanagat

Sa kadagatan sa mga Katoliko.