Kanayonan a mangipila iti kandidaturana idiay Kabayan, Benguet, manamnama a manayonan agingga nga agleppas ti filing of Certificate of Candidacy
Ben Madilynn
Namnamaen ni Alexander Penrad, Election Officer iti Commission on Elections-Kabayan a manayunan pay dagiti mangipila iti kandidaturana agingga iti maudi nga aldaw ti filing of Certificate of Candidacy.
Iti pannakiuman ti Bombo Radyo kenkuana, kinuna a dumanonen iti dua pulo a kandidato ti nangipila iti Certificate of Candidacy dagitoy para iti kina-konsehal iti nasao a munisipyo.
Sagdudua metlaeng ti nangipila para iti kina-mayor no sadino dagitoy da Incumbent Florante Bantales Jr. ken incumbent councilor Rex Alwin G. Aquisan bayat a dagiti nangipila met iti bise-mayor ket da incumbent councilor Sario M. Minas ken incumbent vice mayor Mike Esnara Badival.
Iti sabali a bangir, dandani metten iti 10,000 ti bilang dagiti botante iti nasao a munisipyo.
Sigun kenni Penrad, nanayunan daytoy kalpasan a nagpareactivate manen dagiti 456 a deactivated a botante.
Innayonna met a nagbalin a nasayaat ken naannayas ti filing of Certificate of Candidacy sipud pay nangrugi daytoy.
