Mario Bautista
Inabswelto ti Sandiganbayan da Chief Presidential Legal Counsel Juan Ponce Enrile ken dagiti padana nga akusado a da Jessica Lucila “Gigi” Reyes ken Janet Napoles, iti kaso a plunder nga adda pakainaiganna iti pork barrel scam.
Segun iti Sandiganbayan Special Third Division, saan a nagballigi ti prosekusyon a paneknekan a guilty beyond reasonable doubt dagiti akusado.
Inyunay-unay ni Enrile nga awan ti ebidensya a mangpaneknek nga inikkan isuna ni Napoles wenno Ruby Tuason iti kuarta.
Awan pay ti pammaneknek nga inyendorsona dagiti NGO ni Napoles kadagiti nadumaduma nga ahensia ti gobierno ken inaramatna ti posisyonna tapno agpabaknang.
Ni Enrile ken ni Reyes ket naakusaran a nakikunsabus ken ni Napoles tapno makaipuslit iti P172.83 million kickback manipud iti Priority Development Assistance Fund ti dati a senate president babaen kadagiti ghost non-government organization a binukel ni Napoles.
