Task force gitukod pag-monitor sa mpox

Mangulo si Mayor Raymond Alvin Garcia sa inter-agency task force aron pag-monitor ug pagtubag sa mga kaso sa Monkeypox (Mpox) sa Dakbayan sa Sugbo.

Ang task force gitukod human sa report nga ang siyudad dunay upat ka suspected cases ug ang mga pasyente gi-quarantine na ug gipahigayon ang contact tracing.

Ang task force nga gimugna pinaagi sa usa ka executive order sa mayor nga gipirmahan niadtong Lunes, Hunyo 2, 2025, naglakip sa mga importanteng departamento ug komite sa siyudad sama sa City Health Department (CHD), Office of the City Administrator, committee on health sa City Council, Business Permits and Licensing Office (BPLO), Cebu City Disaster Risk Reduction and Management Office (CCDRRMO), Department of Social Welfare and Services (DSWS), Cebu City Medical Center (CCMC), Local School Board, Public Information Office (PIO), ug Barangay Affairs Office (BAO).

Kabahin sab sa task force ang Department of Health (DOH) ug Department of Education (DepEd).

Ang ilang mga gimbuhaton mao ang pag-monitor sa gidaghanon sa mga kaso sa Mpox ug pagsumite og adlaw-adlaw nga report sa mga suspected o confirmed cases, pag-andam og Mpox emergency plan, pag-coordinate sa mga ahensiya sa nasudnong gobiyerno, ug ang pagpalig-on sa kampanya sa impormasyon aron masabwag ang kahibalo bahin sa paglikay sa maong sakit.

“This is all encompassing, this will hopefully address the concerns on the Mpox virus,” matod ni Garcia.

Gipasabot ni Mayor Garcia nga ang tutokan ang pagtubag ug surveillance imbes sa paghimog kakulba nga  ang Mpox dili airborne ug mokaylap pinaagi sa skin-to-skin contact. 

Gibutyag sab niya nga dunay isolation facilities ang siyudad susama sa niaging kasinatian sa COVID-19. 

Subay niini, nanawagan si Mayor Garcia sa National Bureau of Investigation (NBI) nga imbestigahon ang mga tawo nga nagpakaylap og sayop nga impormasyon bahin sa posibleng lockdowns tungod sa Mpox.

Samtang anaa na ang mga bakuna alang sa Mpox, wala pa kini magamit sa Pilipinas ug ang DOH ang gilauman nga mopalit niini.

Sa iyang bahin, si DOH 7 Director Joshua Brillantes nitaho nga dunay bag-ong lima ka suspected cases sa rehiyon ug unom ka confirmed cases sukad niadtong Enero sa Mandaue, Talisay, Lapu-Lapu City, ug Cebu City. 

Sa unom, lima ang nangaayo na ug usa ang namatay.

Samtang sa Dakbayan sa Mandaue, gipalig-on sab ang ilang pagtubag sa Mpox pinaagi sa pag-coordinate sa mga health workers sa barangay, lakip ang mga nurse ug midwives aron mapalambo ang pagpangandam. 

Si City Administrator Jamaal James Calipayan nagkanayon nga dili pa kinahanglan nga motukod og task force gawas kung mosamot ang sitwasyon ngadto sa usa ka outbreak. 

“Dili pa kini outbreak, so at this point, we are focusing on preventive coordination rather than creating a separate task force,” pasabot ni Calipayan.

Ang Mandaue City adunay usa ka suspected case nga nagpaabot sa confirmatory test results. / JPS / CAV