Asawa gipatay sa kapuyo kay ‘dunay lain’

Patay ang usa ka 33 anyos nga babaye human dunggaba sa iyang kapuyo sulod sa ilang kwarto samtang natulog alas 4:30 sa buntag, Biyernes, Mayo 30, 2025, sa Purok 7, Barangay Botong, Lungsod sa Valencia, Probinsiya sa Bohol.

Ang maong panghitabo nasaksihan sa ilang 11 anyos nga anak.

Ang biktima giila nga si Marisol Lagare Mojado, 33, nga nakaangkon og samad dinunggaban sa dughan ug ubang bahin sa lawas gamit ang 16 ka pulgada nga sundang.

Ang suspek mao ang kaipon niini nga si Mario Dairocas, 47, nga daling nadakpan human nitahan sa mga barangay official sa Botong.

Sa imbestigasyon sa Valencia Municipal Police Station nga base sa pamahayag sa 11 anyos nga anak nga samtang natulog ang iyang inahan nabantayan niya ang iyang amahan nga wala matulog nianang gabii.

Apan kalit lang siya nga mibangon ug nikuha og sundang ug dayong dunggab sa iyang inahan nga niadtong tungora nahinanok pa sa pagkatulog.

Human niya madunggabi sa dughan usban pa unta niya kini apan nakasagang ang biktima gamit ang iyang mga bukton.

Nakuha sa mga imbestigador ang sundang nga gigamit sa krimen nga dunay gitas-on nga 16 pulgadas.

Matod sa case investigator sa Valencia Municipal Police Station nga si Police Master Sergeant Renie Neneria, tumang pangabubho ang hinungdan sa krimen.

Gisaysay sa suspek ngadto kaniya nga nakadawat siya og estorya nga dunay laing lalaki nga gikabuangan ang iyang kaipon nga tungod ani wala na siya mahimutang.

Nibutyag sab kini nga atol sa hitabo daw sa wala siya sa iyang pangisip ug napawong ang iyang panan-aw ug wala na siya masayod sa iyang nahimo.

“Tungod lang gyud sa selos ba, nakadungog daw na siya og estorya nga naa nay lain ang iyang kaipon bisan dili gud tinuod kay amo man na estorya ang mga silingan, seloso lang gyud daw na kaayo ang suspek,” matod ni Neneria.

Gipasakahan na og kasong Homicide si Dairocas ug nipakita siya og pagmahay sa iyang nahimo. / AYB