Ben Madilynn
USA ka lola nga napatik sa listahan sa Philippine Drug Enforcement Agency (PDEA) 7 ug sa Philippine National Police isip high value individual ang napusasan sa gilusad nga buy-bust sa Purok Greenville, Barangay San Isidro, Siyudad sa Talisay sa alas 9:55 sa buntag, Dominggo, Hunyo 1, 2025.
Ang suspek giila nga si alyas Nanay, 60, residente sa maong lugar.
Nakuha sa mga operatiba sa PDEA 7 Regional Special Enforcement Team ug Talisay City Police Station ang upat ka pakete sa gituohang shabu nga motimbang sa 100 gramos nga dunay estimated average market value nga P680,000.
Lakip sa nasakmit ang mga resibo sa usa ka money transfer nga gituohang halin sa iyang pagpamaligya sa ilegal nga drugas ug mga drug paraphernalia.
Matod ni Leia Alcantara, information officer sa PDEA 7 nga tulo ka semana nila nga gipaubos sa case buildup ang suspek human nigawas ang iyang pangalan.
Giingon’g makabaligya ang dinakpan og 100 grams nga shabu matag semana.
Padayon pang giila sa PDEA 7 kon si kinsa ang iyang supplier sa drugas.
Ang mga nakuhang ebidensya giduso na sa PDEA 7 Regional Office Laboratory alang sa proper disposition.
Kalapasan sa Section 5 ug 11, Section II, Republic Act 9165 ang gipasaka nga kaso sa PDEA 7 batok sa maong suspek. / AYB
Source: Lola gibuy-bust, nakuhaa’g P680K shabu
