Ben Madilynn
GIHANGYO karon sa awtoridad, labi na sa Siyudad sa Davao, nga dili hatagan ang mga nanglimos nga mga Badjao subay sa Anti-Mendicancy Law ubos sa Presidential Decree No. 1563.
Kini human nga giingong dunay natigayon nga pagpangdapat sa usa ka Badjao sa usa ka indibiduwal human alegasyong nasuko kay wala kini nahatagan.
Gilayong nag-trending sa social media ang giingong gidapatan sa Badjao ang traysikel drayber ug ang pasahero kay nasuko kuno nga wala nahatagan sa pagpanglimos niini.
Gilayong mihatag og aksiyon ang Paginhawaan Drop-In Center for Children (PDICC) diin alas 5:30 sa hapon, Oktubre 2, 2024, mitaho kini sa Toril Police Station labot sa hitabo.
Sila Police Corporal Mary Cris Q. Campogan, kauban ang tim niini nga mga police auxiliary, onboard sa mobile unit 37, nga gi-manned ni Police Senior Sergeant Edel Durg Versano, ilang gisubay ang McArthur Highway sa Toril, Davao City.
Ilang na-rescue ang walo ka mga hamtong ug lima ka mga menor de edad ug gilayong gi-turnover sa Quick Response Team for Children’s Concern (QRTCC) sa Davao City Social Welfare and Development Office (CSWDO).
Mga na-rescue wala gibutyag sa Davao City Police Office (DCPO) nga sila ang responsable sa nag-trending sa socmed nga nangdapat, apan sila subject sa pag-rescue gumikan gidili ang pagpanglimos subay sa balaod.
Mamahimong dunay silot ang mga masakpan nga mohatag og limos sa mga nanglimos sa kadalanan subay sa Anti-Mendicancy Law. (JPC)
