Ben Madilynn
Dear Papa Joe,
Ako diay si Mary, usa ka single mom, 40 plus nako karon ug naay usa ka anak babaye nga 14 anyos ang pangedaron. Wala gyud mohatag og suporta ang amahan ani maski na lang pag giya kay utro pud nga bisyuso.
Nilarga ko og Taiwan ug gibilin nako akong anak mga 8 anyos pa to siya ato ug gibilin nako sa akong igsuon kay wala naman koy ginikanan pero niingon ako igsuon nga papaulion na lang daw ko kay di na niya kaya mobantay o moatiman sa akong anak kay gahi daw og ulo.
So mao to niuli ko ug nitrabaho ko sa Lapulapu isip factory worker. Ako lang siya ibilin sa balay kung gabii na kay gabii man ako duty pero malantaw ra nako siya basta buntag, pero wa gyud mawa ang iyang kabadlungon.
Karon lang nga daga na nasakpan nako nga niapil-apil na siya og gang ug usahay di mouli ug tubag-tubagon lang ko. Unsa may angay nakong buhaton ani? Palihug tambagi ko.
MARY
Mary,
Di man ta kinahanglan pa mo blame no? Pero kini resulta ra sad sa atong mga binuhatan sauna, sa panahon nga nisud ta og relasyon nga wa gani nato ilha ug planohi ang tanan.
Saludo ko nimo kay despite sa nahitabo nimo nibarog gihapon kang responsable sa imong anak ug mao lagi ni niresulta sad sa wa nimo paggiya niya.
Samtang wala ka basin di maayo ang pagtratar sa imong igsuon niya o nasubrahan ra sad siya ka gawasnon nga nainpluwensyahan siya sa laing mga badlungon kung diin mas kumportable siya didto.
Uso na bitaw ang grupo-grupo ron ug hinaut nga di mahitumpawak imong anak. Mangita gyud ka og time nga magka-interest siya diha nimo ubanan sa pag-ampo nga malamdagan siya.
Kung makakita ka nga naa silay grupo, mangayo ka og tabang sa kapulisan nga mapauli na sila. Usa sa pinaka-epektibo unta mao ang pagstrikto sa curfew.
Papa Joe
(Sa inyong tampo ipadala lang sa papajoesuperb@gmail.com)
