Kampo ni Incumbent Congressman Eric Go Yap, naituding a mangipila iti pinal a petisyon kontra iti kandidatura ni Adam Yap a tumaray kas kongresista ti Benguet
Ben Madilynn
BENGUET- Naituding a mangipila inton bigat, Oktobre 4, ti legal counsel ni incumbent Congressman Eric Go Yap iti final petition kontra iti Certificate of Candidacy nga impila ni Adam Yap para iti kina-kongresista ti Benguet.
Nakalanad iti inisial a petision ti kampo ni incumbent Congressman Yap, a kidkiddawenda iti Commission on Elections a sukimatenda ti kandidatura ni Adam Yap nu maibilang daytoy kas nuisance candidate.
Patien ti kampo ni Yap a posible a matikaw dagiti botante iti aldaw ti panagbobotos gapu ta agpada dagitoy iti apelyido ngem saanda nga agkapinpin-ano wenno agkabagyan.
Nupay kasta, saan paylaeng nga inawat ni Atty. Elenita Julia Tabangin-Capuyan, Provincial Election Supervisor ti COMELEC – Benguet ti nasao a petision gapu ta awan ti pirma ni incumbent Congressman Yap ken awan pay ti pammaneknek a palpalubosanna ti legal counselna a mangipila iti petision.
Maipalagip nga idi Martes, Oktobre uno ket nangipila ni Adam Yap iti kandidaturana para iti kina-kongresista ti Benguet.
Kalpasan daytoy ket nangipila met iti petisyon ti kampo ni incumbent Congressman Yap a mangkidkiddaw iti pannakasukimat ti kandidatura ni Adam Yap.
Iti met interview ti Bombo Radyo kenni Adam Yap seknan kadagiti plataporma wenno nakalinya a programana iti kanito a mangabak daytoy ket kinunana nga awan paylaeng.
Sinaludsod pay ti Bombo Radyo nu adda ti indibidual wenno organisasion a nangiduron kenkuana a mangipila iti kandidaturana ngem kinuna a bukodna daytoy a desision.
Kabayatanna, sigun met kenni Atty. Elenita Julia Tabangin-Capuyan, Provincial Election Supervisor ti COMELEC – Benguet , inlawlawagna a saanda a mabalin nga ideklara ni Adam Yap kas nuisance candidate agingga a saanda pay a naammoan nu anya ti rason iti panagtarayna iti nangato a posision.
