abyasa
LAOAG CITY – Natay ti maysa a lalaki kalpasan a nagbekkel iti poon ti mangga iti paset ti Sitio Bengbengcag, Brgy. 4, Bimmanga iti ili ti Piddig.
Daytoy ti kinumpirmaran ni Police Major Kristian Lee Badua, ti chief of police iti ili ti Piddig.
Segun ken ni Badua, ti biktima ket agtawen ti 62, construction worker, taga Cagayan ngem agdama nga agnanaed iti Brgy. Callusa iti nadakamat nga ili.
Inbatad na a nakaawat da ti report iti oras ti alas-8:15 ti bigat idi kalman, Oktubre 3 manipod ken ni Barangay Chairwoman Carolina J. Balguna iti Barangay Bimmanga mainaig iti panagbekkel ti nasao a biktima.
Insigida a nagturong dagiti kameng ti pulisya iti lugar ken ditoy a nakita da a nakabitin paylaeng ti biktima iti poon ti mangga babaen ti panagusar na ti tali.
Inpakaammo ni Badua nga iti pannakaeksamen ti biktima babaen ken ni Dr. Maricon Martin iti Rural Health Unit iti ili ti Piddig ket indeklarar na a pimmusay daytoy gapu iti asphyxia babaen iti panagbekkel ken awan ti nakita da a foul play iti napasamak.
Mainaig iti daytoy, kuna ni Badua a basar pay iti imbestigasyon da ket pito a tawenen a nagsina ti biktima ken ti asawa na gapu ta saan da nga agkinnaawatan.
Innayon ni Badua a nagturong ti biktima iti balay ti asawa na ken nagin-inom ti arak kagiddan ti panangibagbaga na nga agpakamatay, ngem inbalakad ti pamilya na nga asistiran da lattan nga agawid laengen idiay Cagayan.
Nupay kasta, bigla a nagpukaw ti biktima ken ti kabigatan na ket nakita laengen daytoy a nagbekkel iti poon ti mangga, ken adda pay ti nakita a bote ti arak iti abayna.
Ti poon ti mangga a nagbekkelan ti biktima ket nababa laeng ngem nagparintumeng daytoy ken inpilit na ti nagkettel ti bukod na a biag.
Mainaig iti daytoy, kuna ni Badua a basar iti imbestigasyon ken obserbasyon da ket agpaspasar ti nasao a biktima ti depresyon gapu iti problema ti pamilya ken immunan a ginandat na ti agpakamatay idi Oktubre 2, 2024.
Iti agdama, nakamansayag ti biktima iti balay da iti ili ti Piddig ken maiyur-uray ti desisyon ti pamilya na no iyawid da daytoy idiay Cagayan.
