Manghimuay og armas, sikop

Wala kaipsot sa mga operatiba sa kapulisan ang manghimuay og paltik nga armas dihang nadakpan atol sa buy-bust alas 5:30 sa hapon, Mayo 29, 2025 didto sa Purok Torre, Barangay Lupa, Lungsod sa Compostela.

Usa ka Eric, 35, ulitawo nagpuyo sa nahisgutang lugar napusasan human gipalitan sa mga operatiba sa Compostela Police Station og usa ka .357 revolver nga mobalor sa P2,500 ka pesos. 

Atol sa operasyon nasakmit sab sa kapulisan ang daghang kahimanan sa paghimog paltik nga armas. 

Kini naglakip sa usa ka .357, buy-bust money nga P2,500, duha ka spring 1 magazine, usa ka electric grinder, tulo ka bench vise, duha ka drill press, nagkalainlaing pattern sa kalibre sa mga armas, ug nagkalainlaing tool ug mga tubo.  / GPL