OWWA, inpasigurado na ti naan-anay a tulong para kadagiti mairepatriate a Pilipino manipod idiay Lebanon
abyasa
LAOAG CITY – Naikari kadagiti mairepatriate nga Overseas Filipino Workers manipod idiay Lebanon ti pannakaipaay kadakuda ti naan-anay a suporta ken tulong manipod iti gobierno iti isasangpet da ditoy pagilian.
Daytoy ket kalpasan ti direktiba ni Presidente Ferdinand Marcos Jr., a siguradawen a maipaayan ti naan-anay a tulong kangrunaan na ti tulong pinansyal kadagiti mairepatriate a Pilipino manipod idiay Lebanon.
Segun ken ni Overseas Workers Welfare Administration Repatriation and Assistance Division Chief, Atty Falconi Millar, amin a wagas ket ar-aramiden da tapno maiyawid iti pagilian dagiti kadaraan a maip-ipit iti gubat idiay Lebanon.
Kuna ni Millar a katulungan ti Overseas Workers Welfare Administration ti Department of Migrant Workers tapno maibakwit dagiti kadaraan iti Lebanon.
Inpakaammo na nga adda ti P150,000.00 a pinansyal a tulong ti maawat ti kada Overseas Filipino Worker nga agawid ditoy pagilian.
Innayon na nga iti agdama ket addan ti 111 nga Overseas Filipino Workers ti agur-uray ti repatriation iti Lebanon.
Makikokoordinar metten ti gobyerno iti babaen ti one country team approach.
