Ben Madilynn
Wala na matabang sa mga rescuer ug nakabsan sa iyang kinabuhi ang mananagat nga namana og isda sa kadagatan sa Barangay Bato, lungsod sa Samboan, Lalawigan sa Sugbo.
Ang namatay giila nga si Gilbert Omaña, 31, ulitawo, taga Sityo Inadlay, Barangay Talisay, lungsod sa Santander.
Sa pasiunang imbestigasyon sa Samboan Police Station nga si Omaña ug laing duha ka mga kauban ang nanagat pinaagi sa pana niadtong alas 8:00 sa gabii, Martes, Oktubre 1, 2024 sa nahisgutang dapit.
Namatikdan na lang sa mga kauban ni Omaña nga wa na kiniy umoy ug mitidlom sa gibanabana nga 25 metros nga gilawmon sa dagat. Gisawom sa iyang mga kauban ug dali nga gihaw-as aron sa pagtabang sa dihang nakapangayo og tabang ang mga kauban ngadto sa Philippine Coast Guard ug Samboan Municipal Disaster Risk Reduction and Management Office.
Apan gideklarar nga patay sa dihang gidala sa ospital.
Nasuta nga giingong nakainom si Omaña sa ilimnong makahubog niadtong higayona.
Apan bisan pa man padayon pa ang imbestigasyon sa kapulisan kalabot sa maong hitabo. / DVG
