Motorsiklo ken SUV, nagdinnungpar iti Brgy. 6 Dilavo iti ili ti Pasuquin; Nakamotorsiklo, dead on the spot
abyasa
LAOAG CITY – Natay ti maysa nga estudiante kalpasan ti panagdinnungpar iti naglugananna a motorsiklo ken SUV iti Brgy. 6 Dilavo iti ili ti Pasuquin.
Segun ken ni P/Maj. Jonvale Maramag, Hepe ti Pasuquin Municipal Police Station, nabigbig ti biktima a nangiturong ti Yamaha Sniper MC nga agmaris ti nangisit a ni Mark Joshua Balibago Viernes, agtawen iti 22, estudiante ken residente ti Brgy. Dampig iti ili ti Pagudpud idinto a nabigbig met ti driver ti Gray Metallic Toyota Hilux a ni Marcelino Dotimas Galla, agtawen iti 64, married, residente ti Cadcadir East idiay Claveria, Cagayan.
Inbatadna a basar iti inwayatda nga imbestigasion, kabayatan a dumaldalyasat ti SUV nga agpa-amianan iti kurbaan a paset ti kalsada ket napukawan ti kontrol ti manibela a rason a napan daytoy iti bangir a linya ti kalsada a nangitunda met ti panagdinnungparda ti nakamotorsiklo nga agpa-abagatan.
Gapu iti daytoy, natnag ti driver ti motorsiklo ken naipurwak iti agarup 30 a metro ti kaadayona manipud iti nakapasamakan ti desgrasia idinto a natnag iti derraas ti SUV nga adda ti kaunegna a 10 a metro.
Inlawlawagna a dagus a naitaray iti ospital ti nakamotorsiklo para iti naan-anay a pannakataming ngem indeklara ni Dr. Diophantos Acob, Municipal Health Officer iti ili ti Pasuquin a dead on the spot ti biktima idinto a nagsagaba met ti sugat iti muging ken nagduduma a paset ti bagi ti driver ti SUV a naitaray iti Rural Health Unit iti ili ti Pasuquin ngem naiyakar iti Governor Roque B. Ablan Sr. Memorial Hospital.
Naammoan a nagbiahe ti biktima kadayta a gundaway tapno saanen a nasapa nga agbiahe a mapan agbasa iti Mariano Marcos State University iti siudad ti Batac.
Innayonna a manamnama a sumango ti driver ti SUV ti kaso a reckless imprudence resulting to homicide.
