abyasa
LAOAG CITY – Natay ti tallo nga indibidual ditoy probinsia iti iduduprak ti Bagyo Julian.
Basar iti Provincial Disaster Risk Reduction and Management Office, nakita nga adda ti maysa a nalamiisen a bangkay nga agtatapaw iti ili ti Pasuquin iti kangitingitan ti napigsa a tudo a nabigbig a ni Wilfredo Calija, agtawen iti 62 ken residente iti Brgy. 2, Poblacion iti nasao nga ili.
Nalmes met ti maysa a senior citizen iti siudad ti Batac gapu iti napasaran a nakaro a layos gubuay iti Bagyo Julian.
Malaksid iti daytoy, pimmusay ti maysa nga evacuee iti A.P. Santos Elementary School a ni Jamal Mambuay, agtawen iti 35, residente iti Muslim Compound iti Brgy. 1, San Lorenzo ditoy siudad ti Laoag.
Mainaig iti daytoy, segun ken ni Brgy. Chairman Manny Morales ti Brgy. 1, San Lorenzo ditoy siudad ti Laoag, pimmusay ti biktima gapu ta nagbuteng isuna iti panagngato ti lebel ti danom a dimmanon iti pagat-barukong a nangitunda ti pannaka-atake ti pusona kabayatan iti kaaddana iti evacuation center.
Inlawlawagna a dagus a naitaray iti kaasitgan nga ospital ti biktima ngem naideklara a dead on arrival babaen iti Attending Physician.
Kabayatanna, naammoan nga adda pay ti maysa a mapukpukaw a ni Bryan Carlo Bulong Judalena, agtawen iti 30, addaan ti live-in partner ken residente iti Brgy. San Roque iti ili ti Paoay kalpasan a nagsubli iti pagtaenganda iti baet ti napigsa a tudo ken nangato a lebel ti danom gapu iti Bagyo Julian.
Iti agdama, naideklara nga State of Calamity iti intero a probinsia ti Ilocos Norte gapu iti epekto ti Bagyo Julian.
