Ben Madilynn
Mga pinakete nga gisudlan sa gituohang shabu ug armas ang nasakmit sa Mabolo Police Station gikan sa usa ka high value individual (HVI) nga naatlan sa mga polis nga nag-roving sa alas 10:30 sa gabii, Lunes, Septiyembre 30, 2024, Sityo Brooke Side, Barangay Lahug, Dakbayan sa Sugbo.
Ang suspek giila nga si Rolan Trasmonte, 38, lumad nga taga Dakbayan sa Guihulngan, Negros Oriental ug kasamtangan nga nagpuyo sa maong dapit.
Nakuha gikan ni Transmonte ang mga putos sa gituohang shabu nga motimbang sa 50 gramos nga adunay standard drug price nga P340,000 ug usa ka kalibre 45 nga armas nga adunay tulo ka bala.
Matod ni Police Major Romeo Caacoy Jr., hepe sa Mabolo Police Station nga naatlan sa iyang mga sakop ang suspek sa nahisgutang lugar nga nakig-transact sa ilegal nga drugas hinungdan nga gisita.
Nakita sa iyang mga personnel ang mga pinakete diha sa iyang posisyon ug sa pagrekisa nakuha ang giluklok nga armas. / AYB
