Ben Madilynn
TULO ang unang miduso sa ilang kandidatura alang sa nagkalainlaing posisyon sa lalawigan sa Sugbo atol sa unang adlaw sa filing sa Certificate of Candidacy (COC) sa Martes, Oktubre 1, 2024.
Nag-una ug labing sayo nga miduso sa iyang kandidatura si Congressman Pablo John “PJ” Garcia isip reelectionist sa tersero distrito.
Si Garcia miduso sa iyang kandidatura insakto alas 8:00 sa buntag sa buhatan sa Commission on Election (Comelec) Cebu Province kauban ang iyang asawa.
Ikaduha nga miduso sa iyang kandidatura mao si Salvador Arapal Cariaga nga magpapili pagka kongresista sa fourth district.
Si Cariaga usa ka mag-uuma nga nanag-iya sa Arapal Farms sa Dakbayan sa Bogo.
Mao na kini ang ikaduha’ng higayon sa iyang pagpapili sa distrito sukad sa 2022 elections.
Nagtinguha si Cariaga nga bisan pa man sa kapakyasan nga iyang naangkon sa miaging eleksyon, mas mailhan siya sa mga Sugboanon nga dunay dakong paglaom sa pagpalambo sa ikaupat nga distrito pinaagi sa livelihood programs.
Samtang ang ikatulo nga miduso sa iyang COC mao si Dr. Odysseus “Ody” Camarillo nga magpapili pagka board member sa segundo distrito.
Ang Comelec Province modawat sa tanang gusto mokandidato sa piniliay hangtod sa Oktubre 8, gikan sa alas 8:00 sa buntag hangtod sa alas 5:00 sa hapon.
Lakip sa gipahinumdom ni Atty. Marchel Sarno, Election officer sa Comelec Cebu Province nga kompletuhon daan ang tanang mga dokumento sa dili pa kini iduso sa opisina.
Ugaling dunay mga pangutana nga mas maayo usab nga moduaw sa buhatan alang sa mga corrections nga himuon.
Alang sa umaabot nga piniliay, gipaabot ang indigay sa posisyon sa pagka gobernador sa lalawigan sa Sugbo, bise-gobernador, 14 ka mga board members alang sa pito ka distrito ug ang pito ka mga kongresista. /ANV
