Brgys. sa Cebu City tukoran og park

Hugtanong gisuportahan ni Cebu City Councilor Jocelyn Pesquera ang pagpreserbar ug pagmugna og “open spaces” sa tibuok dakbayan hilabi na ang giilugang luna sa yuta sa Old Philippine Railway Residents Association (Oprra), Barangay Kalunasan, nga iyang gidasig nga ibalik sa paggamit sa publiko isip usa ka parke.

Nanawagan siya ni Cebu City Mayor-elect Nestor Archival ug Governor-elect Pamela Baricuatro sa Probinsya sa Sugbo nga unahon ang pagtukod og mga parke sa tanang mga barangay.

Sa iyang privilege speech kaniadtong Miyerkules, Mayo 21, 2025, gihatagan og gibug-aton ni Pesquera ang kasamtangan nga regulasyon sa siyudad, nga nakasaad sa 1996 revised zoning ordinance nga naghulagway sa open space nga lugar nga alang sa mga parke, dulaanan, ug recreational areas.

Iyang namatikdan nga ang usa ka parke gihulagway isip usa ka lugar alang sa aktibo nga paglingawlingaw, nga puwedeng maglakip sa landscaped areas, promenades, mga lingkuranan, children’s play areas, ug mga harden.

Gitugot sab sa ordinansa ang underground parking basta ang ground level ipabilin nga parke.

Gihisgutan sab ni Pesquera ang Presidential Decree 1216, nga nagmando nga ang mga tag-iya o developer sa subdivision kinahanglan maghatag og igong mga karsada, eskinita, ug sidewalk.

Mas gikinahanglan kining mapatuman sa mga proyekto nga usa ka ektarya o labaw pa diin 30 porsyento sa kinatibuk-ang luna kinahanglan irekomenda alang sa open space.

Kining mga luna, basi sa direktiba sa kagamhanan, giingong dili mabaligya sa publiko ug dili matukoran.

Ang direktiba nagtumbok og mga porsiyento alang sa hawan nga luna base sa housing density: nuebe porsiyento alang sa high-density, siyete porsyento alang sa low-density/economic, ug 3.5 porsyento alang sa low-density/open market housing.

Kining adbokasiya nagagikan sa dugay nang isyu bahin sa propreyidad sa Oprra.

Gisaysay ni Pesquera nga kaniadtong 2020, ang Kagamhanan sa Probinsya sa Sugbo nakahukom nga ibaligya ang giparte nga mga lote sulod sa propiyedad ngadto sa kasamtangan niini nga mga nag-okupar.

Si Gobernador Gwendolyn Garcia gihatagan og pagtugot sa Provincial Board kaniadtong Marso 6, 2020, aron ibaligya ang 160,196 square-meter nga yuta.

Sa dugay nang panahon, gitugotan sa Probinsya ang pag-okupar niining gibahinbahin nga mga lote apan, kaniadtong Enero 28, 2020, gipadala ang mga demand letter ngadto sa mga nag-okupar aron bakantehon ang mga home lot nga ilang “illegal nga giokupar.”

Ang panaglalis sa yuta adunay taas nga kasaysayan, nga adunay mga kalambuan sa paghusay niini nga gisugdan pa niadtong Hunyo 7, 1971, dihang gipirmahan sa Probinsya sa Sugbo ug Oprra, Inc. ang sales agreement alang sa 11 ka parcels sa yuta sa P10 matag metro kwadrado.

Paglabay sa 40 ka mga tuig, gi-terminate sa Provincial Board kining maong kasabutan kaniadtong Abril 16, 2021, tungod sa pagkapakyas sa mga miyembro sa asosasyon sa pagbayad.

Matod ni Pesquera nga kon ang PD 1216 ipatuman sa propreyidad sa Oprra, gibanabana nga 48,058.8 square meters ang kinahanglan isip hawan nga luna.

Kon isipon ang lugar nga high-density, ang gimando nga parke nagkinahanglan og 14,417.64 square meters, o nuebe porsyento sa kinatibuk-ang luna sa yuta.

Nakahinumdom si Pesquera nga kaniadtong 1998, ang lugar sa Oprra gigamit gyud isip hawan nga luna.

Apan sa dihang gipakoral kini ni Gobernador Gwendolyn Garcia, giingon nga ang mga tag-iya sa sakyanan gipabayad og hangtod P15,000 matag bulan alang sa bayranan sa parking.

“Now, people no longer have a space for their annual, monthly, barangay activities. And children no longer have spaces to play like now, it’s summer,” asoy ni Pesquera.

Tungod niini, nihangyo si Pesquera kang governor-elect Baricuatro nga ibalik ang luna sa yuta sa Barangay Kalunasan, nga kanhi gigamit isip open space, balik sa paggamit sa publiko ug himuon kini nga libre alang sa tanang mga residente sa Oprra. / JPS