Ting-uwan magsugod sa tunga-tunga’ng bahin sa Hunyo

Gilauman man tuod nga makasinati ang Cebu ug ubang bahin sa Central Visayas og kasagaran ug maayong panahon sa sunod semana apan anaa na karon ang nasod sa panahon sa transisyon padulong sa ting-ulan, nga gipaabot nga magsugod sa ikaduhang bahin sa Hunyo.

Si Jomer Eclarino, weather specialist sa Philippine Atmospheric, Geophysical and Astronomical Services Administration (Pagasa) Visayas, niingon niadtong Dominggo, Mayo 25, 2025, nga bisan tuod temporaryong mobalik sa init ug humid nga kahimtang ang Cebu sunod semana, magpadayon ang presensya sa isolated rain showers ug localized thunderstorms tungod sa nagpabilin nga epekto sa Intertropical Convergence Zone (ITCZ).

“Transition period pa ta padulong rainy season, and we’re looking at the official onset by the second half of June,” matod ni Eclarino sa usa ka phone interview.

“For now, expect ta og init ug igang nga panahon, but occasional thunderstorms can still occur.”

Ang ITCZ, nga nagdala og nagtagbo nga hangin gikan sa amihanan ug habagatang hemisphere, maoy responsable sa bag-o lang nga kalit nga pag-ulan ug padayong makaapekto sa mga pattern sa panahon sa tibuok Visayas ug Mindanao.

Sa Cebu, ang heat index nikunhod og gamay ngadto sa 38 ngadto sa 39 degrees Celsius — nikunhod gikan sa 40°C sa niaging semana — apan anaa gihapon sa kategorya nga “extreme caution.”

Ang aktuwal nga temperatura sa hangin naglangkob gikan sa 27 ngadto sa 30 degrees Celsius.

Gipahinumdoman ni Eclarino ang publiko sa pag-monitor sa opisyal nga mga pahimangno tungod kay ang localized thunderstorms mahimong magdala og kalit, kusog nga pag-ulan nga mahimong hinungdan sa flash floods o landslides, ilabi na sa ubos nga dapit o kabukiran.

“Continue to take precautions against both the heat and potential severe thunderstorms. Stay hydrated and bring protection from the sun,” matod niya.

Ang nasudnong 4:00 a.m. advisory sa Pagasa nagtaho usab sa padayon nga pagdag-om nga adunay nagka­tag nga pag-ulan ug thunderstorms sa Visayas, Northern Mindanao, Caraga, Davao Region, Zamboanga Peninsula, Mimaropa, ug pipila ka bahin sa Bicol Region.

Kining mga kondisyon nahiuyon sa transisyon padulong sa ting-ulan. / CDF