Kawani sa Mandaue City Hall ‘naghinubra’

Nipadayag og kabalaka ang umaabot nga City Administrator Atty. Gonzalo ‘Sally’ Malig-on sa nadiskubrehan nga naghinubra nga gidaghanon sa mga kawani sa Mandaue City Hall. Nasuta sa iyang grupo nga dul-an sa 11,000 ang mga trabahante sa dihang nagpadayon ang transisyon sa umaabot nga administrasyon ni Mayor-elect Thadeo “Jonkie” Ouano.

Si Malig-on, kinsa maoy umaabot nga administrador ug nangulo sa transition team, nibutyag atol sa press conference niadtong Domingo, Mayo 25, 2025, nga ang maong gidaghanon naglakip sa liboan ka mga Job Order (JO) workers, mga casual employees, ug mga indibidwal nga gikuha ubos sa nagkadaiyang programa nga gipundohan sa siyudad.

Matod pa nga naghinubra ang kadaghan sa mga kawani nga nilabaw sa unsa ray angay alang sa siyudad, nga nakapabug-at sa budget sa kagamhanan.

Wa mohatag si Malig-on sa angayan nga gidaghanon sa mga kawani o trabahante sa siyudad, iyang giingon nga ang ang pundo nga isuweldo sa kadaghang kawani magamit ngadto sa mga mahinnungdanong serbisyo.

“That’s unfair to the rest of the Mandauehanons who are deprived of services that should be funded by the city budget, but are instead allocated every month to pay for this bloated workforce,” matod pa niya.

Usa sa labing gikabalak-an, sumala ni Malig-on, mao ang Purok Development Office (PDO), nga matud pa niya nikuhag labing menos 639 ka opisyal nga nakadawat og binulan nga allowance nga tag P4,500 matag usa, uban sa 4,700 ka dugang nga miyembro nga nakadawat og P1,000 matag usa.

Base sa mga dokumento nga gisusi sa transition team, ang Siyudad kasamtangang nagbayad sa 1,080 ka regular nga empleyado, 4,500 ka Job Order workers, 452 ka casual employees, 923 ka personnel sa Clean and Green program, ug liboan pa ubos sa PDO.

MANAKTAK

Matud ni Malig-on, ang umaabot nga administrasyon nagplano sa pagpakunhod sa gidaghanon sa kawani aron makatabang sa pagbawi sa pundo nga gigasto sa sweldo ug honoraria.

Dugang pa niya nga bisan ang partial nga pagkunhod mahimong moresulta sa gatusan ka milyon nga pesos sa tinuig nga tinigom, nga mahimong ibalhin ngadto sa mas mahinungdanon nga mga programa sama sa health care, social services, ug infrastructure development.

“This number is excessive, and it poses a huge strain on the city’s finances. We are spending a significant portion of the budget on salaries alone. This is something that needs to be addressed urgently,” matod pa ni Malig-on.

Iyang gipasabot nga ang plano sa pagpamenos sa gidaghanon sa kawani walay pili apan magbase sa evaluation kon unsang mga posisyon ang gikinahanglan.

Gipunto niya nga ang mga kompetente ug importanteng trabahante ipabilin, ug ang katuyoan sa administrasyon mao ang pag-professionalize sa trabahante sa siyudad samtang nagsiguro sa responsableng paggamit sa pundo sa katawhan.

Gipasalig usab niya nga ang mga nag-una nga opisina sa siyudad nga naghatag og frontline services, lakip na ang City Hospital, City Health Office, City Disaster Risk Reduction and Management Office, ug ang Traffic Enforcement Agency of Mandaue, magpadayon sa pag-operate nga walay hunong.

Si Mayor-elect Ouano pormal nga molingkod sa katungdanan sa udto sa Hunyo 30, hulip ni outgoing Mayor Jonas Cortes.

GITUBAG

Sa pagtubag sa mga pamahayag sa transition team, ang outgoing City Administrator Jamaal James Calipayan nanawagan maghinayhinay ug likayan ang pagdali-dali sa paghimo og konklusyon.

“Let’s talk again in 6 months or 1 year, after the full responsibility of running a city is brought to bear upon them. Then maybe their conclusions would have some credibility. For now, let’s not be hasty, running a city is not as easy as looking at the numbers,” sigun pa ni Calipayan. / CAV