Ben Madilynn
Labing una nga Certificate for Candidacy (COC) nga giduso sa Commission on Election (Comelec) gikan sa usa ka taxi drayber nga nagtinguha nga magpapili pagka-konsehal sa Dakbayan sa Sugbo.
Si Abraham Alcontin Verdida, 57, taga Barangay Labangon, Cebu City kinsa lima na katuig nga nagmaneho og taxi isip iyang panginabuhian ang mi-file sa iyang COC, Martes, Oktubre 1, 2024 nga maoy unang adlaw sa pagpanawat og COCs gikan sa mga kandidato nga magpapili alang sa May 2025 midterm election.
Nagkanayon si Verdida sa dihang nahinabi sa mga tigbalita nga ang iyang tinguha nga magpapili pagka-konsehal sa Cebu City South District aron makatabang sa riding public ingon sa iyang kauban nga mga taxi drayber.
“Aron naa koy ikatabang sad… drayber man ko og taxi. Aron naa koy matabang sa akong mga kaubang drayber parte og ayuda,” pamahayag ni Verdida sa dihang nahinabi sa DYLA Cebu Newsbreak sa pangutana og unsay nakaaghat niya nga mosulod sa politika.
Matod pa ni Verdida nga magpalibre’ng sakay siya sa iyang taxi atol sa iyang adlaw nga natawhan matag Enero 12.
Gawas pa magpa-raffle siya og tulo ka sakong bugas, kini usa ka paagi sa pagpasalamat sa Labawng Makagagahom sa grasya, kapiskay sa panglawas ug dugang tuig sa iyang kinabuhi.
Si Verdida kanhi city hall employee isip drayber sud sa unom ka tuig apan nataktak niadtong tuig 2016 sa dihang nag-ilis og administrasyon, nahimong habal-habal drayber ug karon usa na ka taxi drayber.
Dili kini ang unang higayon nga magpili si Verdida kay sa miaging barangay election nagpapili siya pagka-konsehal sa Labangon apan wa buligi sa kahigayonan. / EHP, FVQ
