4 ka tawo namatay sa HIV

GITAHO sa Department of Health–Davao Region (DOH-Davao) nga sa kinatibuk-ang 177 ka kaso sa Human Immunodeficiency Virus (HIV) sa rehiyon gikan Enero hangtud Pebrero 2025, upat niini namatay na.

Gibutyag ni Dr. Abdullah Dumama Jr., DOH undersecretary ug mao sab ang Department of Health–Davao director, nga sukad 1993 hangtud sa kasamtangan, dunay mga 8,222 ka mga kaso sa HIV, ug nakatala na sila og mga 400 namatay tungod sa HIV.

Dugang ni Dumama nga ang nag-unang matang sa pagtakod sa HIV mao ang pagpakighilawas sa lalaki sa lalaki, ug kadtong komon nga natakdan sa kagaw kasagaran nag-edad og 25 ug 35 anyos.

“This is through sexual intercourse. Kailangan pa rin natin gumamit ng condom, kung pwede may lubricant at tsaka may prep tayong available, pre-exposure prophylaxis,” pag-esplikar niini atol sa paghinabi uban sa mga tigbalita, Biyernes, Mayo 23, 2025.

Gisulti sa DOH-Davao nga naghatag sila og libreng antiretroviral drugs ngadto sa mga tawo nga nagpuyo uban ang HIV/Aids.

Dugang sa departamento nga duna sila’y igo nga suplay sa tambal, mga grupo nga nagsuporta nga makaabag sa mga indibiduwal nga nagpuyo nga dunay HIV, ug libreng testing services apil na ang “access to pre-exposure prophylaxis.”

Gisulti sab sa departamento nga mga P4.5 milyon gigahin alang sa pagbansay nga dunay kalambigitan sa HIV/Aids, pagpanambag, ug mga probisyon sa 2025.

Gani ang badyet karong tuiga mas taas pa itandi sa niaging tuig tungod sa pagdaghan sab sa mga tawo nga nagpuyo na uban sa HIV/Aids.

Sa rehiyon, dunay mga lima ka testing centers nga mao ang Southern Philippines Medical Center (SPMC), Davao Regional Medical Center (DRMC) sa Tagum, Reproductive Health and Wellness Center (RHWC), LoveYourself by Jefrreyi, ug Davao Doctors Hospital.

Sa pikas bahin, mga volunteers, civil society members, ug government officials nagtapok sa Rizal Park, Davao City, aron magdagkot og kandila sa usa ka solemne nga seremonyas aron pagpataas sa kaamgohan bahin sa HIV/Aids.

Gipasabot ni Dumama nga pinaagi sa candle-lighting ceremony, ilang gitamod ang mga kinabuhi sa indibiduwal kinsa namatay tungod sa HIV/Aids.

Samtang si Davao City Mayor Sebastian “Baste” Duterte, pinaagi sa mensahe, nagkanayon nga ang City Government of Davao nagpabiling pursigido sa ilang adbokasiya alang sa pagpakgang, pagtambal, pag-atiman, ug pagsuporta sa mga tawo nga nagpuyo uban ang HIV.

“It is imperative that we continue working hand in hand to combat and prevent its upsurge,” pasalig niya.

Dugang pa ni Duterte nga matag usa mohimo og “proactive steps” aron sa pagwagtang sa “stigma,” pagpataas sa kaamgohan, pag-alima sa sosyedad nga nakaugat sa kaluoy, kahibalo, ug pagpagahum.

Naa lang kanunay ang libreng HIV/Aids testing sa mga nahisgutang lugar alang sa Dabawenyos nga tinguha nga mahibawo sa ilang kahimtang, uban ang libreng kontrasepsiyon alang niadtong nagkinahanglan niini. Ang tema karong tuiga mao ang “We Remember. We Rise. We Lead.” (Rojean Grace G. Patumbon)