Ben Madilynn
Daghang manimbahay ug managkutay ang wala makasulod sa Basilica Minore del Santo Niño (BMSN) human nga dili pasado sa gipatuman nga dress code sa simbahan ang ilang gisul-ob.
Ang BMSN nagpagawas ug advisory niadtong Septiyembre 1, 2024 bahin sa bag-ong dress code apan pipila ka semana sa wala pa ang pahibalo, usa ka miyembro sa LGBTQIA+ nga gibabagan nga makasulod nga makasulod sa BMSN sa babaye nga tourist police officer ug duha ka security guard niadtong Hulyo 27, nga ipaklaro ang polisiya sa dress code sa Basilica.
Usa ka inahan kinsa mihangyo nga dili hinganlan ang wala nakasulod sa simbahan uban sa iyang anak nga babaye gikan sa Capitol Site, Cebu City, tungod kay mubo ang palda sa uniporme sa iyang anak.
Miingon siya nga ang simbahan angayng mokonsiderar sa mga estudyante, labi na kadtong nagsuot sa ilang prescribed nga uniporme.
Gikan pa sila sa tunghaan ug igo lang mihapit sa Basilica aron modagkot tungod kay nagsaulog sa iyang birthday ang iyang anak.
Wa na lang sila mopugos og sa gawas nga bahin sa simbahan na lang sila midagkot.
Sumala pa sa inahan nga nasayod siya sa bag-ong dress code pero wala siya magdahom nga apil ang uniporme sa estudyante.
Ang Basilica mipapawas og pahibawo bahin sa dress code atol sa ilang misa sukad niadtong Dominggo, Septiyembre 1, nga gisugdan sa pagpatuman Martes, Oktubre 1.
Dili na sab magpahuwam ang Basilica og shawl o sarong alang niadtong nag-shorts o sleeveless ang gisul-ob.
Samtang si Margie Jalandoni, 60, manindahay og kandila nga midako ang kita sa iyang sa kandila kay inay ang managkutay mosulod sa dagkutan sa Basilica, dili makalahos gumikan sa ilang gisul-ob ang mapugos og panagkot sa gawas.
“Mas daghan ang mamalit og kandila sa sulod pero karon nga daghan wala kasulod, daghan ang namalit namo, minus na nuon sa sulod,” matod pa ni Jalandoni nga naninda og kandila sud sa 40 ka tuig.
Ang mosulod sa Basilica gilauman nga magsul-ob og sinena sama sa blouse nga may kwelyo, adunay bukton, polo shirts, t-shirts, ug long-sleeve shirts, ug closed shoes o sandals.
Shorts, sleeveless, low cut, backless blouses, low-waist nga karsones ug ripped jeans ang ginadili. / CDF
