21 ka barangays sa Mandaue gideklarar nga drug-cleared

OPISYAL na nga gideklarar nga drug-cleared sa mga otoridad ang 21 sa 27 ka mga barangay sa Dakbayan sa Mandaue.

Kabahin kini sa nagpadayon nga kampanya sa dakbayan batok sa ilegal nga droga.

Lakip sa bag-ong gideklarar mao ang mga barangay sa Cabancalan ug Maguikay, nga ubos sa hurisdiksyon sa Police Station 4.

Ang pahibalo gihimo human sa kompirmasyon nga nakab-ot sa maong mga barangay, ang tanang criteria nga gitakda sa Regional Oversight Committee on Barangay Drug Clearing Program.

Matod ni Ben Manzano, pangulo sa Substance Abuse Mental Health and Services Office (SAMSHO), madawat na sa dili madugay sa mga barangay ang ilang pormal nga mga sertipikasyon gikan sa komitiba.

“These newly declared barangays have fulfilled the documentation requirements showing that individuals on the barangay drug watchlist have undergone general interventions and participated in community-based rehabilitation programs,” asoy ni Manzano.

Ang kompletong lista sa drug-cleared nga mga barangay sa Mandaue naglakip na karon sa Bakilid, Tawason, Subangdaku, Tingub, Paknaan, Casili, Opao, Tabok, Basak, Mantuyong, Canduman, Casuntingan, Cambaro, Ibabao-Estancia, Banilad, Cubacub, Guizo, Labogon, ug Pagsabungan.

Sumala sa Philippine Drug Enforcement Agency (PDEA), ang usa ka drug-cleared nga barangay mao ang usa nga kaniadto naapiktuhan sa ilegal nga droga apan malampusong nakaagi sa clearing operations ug karon gawasnon na sa bisan unsang kalambigitan sa droga.

Samtang ang usa ka drug-free nga barangay, nga wala gyu’y presensya o kalihukan sa droga, gikonsiderar nga mas lisod kab-uton. Naglaum si Manzano nga kining bag-ong kalambuan makadasig sa nahabilin nga mga barangay nga pahugtan ang ilang paningkamot batok sa druga. / CAV