2 linemen sa MECO nakuryentihan, luwas

Nakuryentihan ang duha ka linemen sa Mactan Electric Company (Meco), Inc. ug nakaangkon og second-degree burns samtang naghimo og maintenance work sa National Highway sa Bara­ngay Pajo, Lapu-Lapu City sa Biyernes, Mayo 23, 2025.

Si Police Major Felix Cleo­pas III, Station Commander sa Lapu-Lapu City Police Office Sta­tion 3, sa iyang gipadangat nga mensahe sa SunStar Cebu sa Sabado, Mayo 24, nagkanayon nga ang duha gitambalanan na ug anaa sa luwas nga kahimtang.

Sa police report, giila ang mga biktima nga sila si Junrel Rabago, 41, taga Barangay Bon-bon, Cebu City, ug Jomar Cabiso, 26, taga Barangay Day-as, Cebu City.

Sila si Rabago ug Cabiso mga linemen sa nahisgutang electric utility company.

Basi sa imbistigasyon, ang insidente nahitabo alas 2:10 sa hapon samtang ang Mactan Electric Company maintenance team, gipangulohan ni Felix Inoc, naghimo sa gitakda nga preventive maintenance sa National Highway sa Barangay Pajo.

Matod ni Inoc nga sila si Rabago ug Cabiso diha sa boom truck nag-andam sa pag set up sa cluster ground. Samtang naggamit og cluster stick, ang duha nakahikap og live wire.

Nagtuo ang duha ka linemen nga ang linya nga ilang nahikapan na-de-energized na apan ang power reversal nimugna og high-voltage surge ngadto sa wire.

Kining wa damha nga panghitabo niresulta nga nakuryentihan ang duha ka linemen hinungdan sa ilang pagkapaso.

Bisan sa kakalit sa hitabo, sila si Rabago ug Cabiso wa kawagtangi sa ilang panimuot.

Gihatagan dayon sila og first aid sa wa pa dad-a sa pribado nga ospital sa Dakbayan sa Mandaue alang sa dugang medical treatment. / DPC