Pagpakural sa Pasil Fish Market gikuwestiyon

Nakamugna og debati sa City Council ang gisugyot nga fencing project sa Pasil Fish Market, kansang katuyoan mao ang mapahugtan ang seguridad ug kahapsay sa merkado.

Adunay mga kabalaka kabahin sa epekto niini nga posibleng maghatag og kalisod sa mga tawo sa gustong mamalit sa maong lugar nga makaapekto sa ekonomiya sa merkado.

Gihulagway ni Konsehal Jocelyn Pesquera ang lugar nga “puno sa mga kalihukan sa ekonomiya” tungod sa papel niini sa mga mamalitay ug namaligya ug gitinguha usab kini nga himuong island-hopping port sa umaabot.

Si Pesquera, kinsa naglingkod isip tsirman sa Commission on Tourism, naglaraw nga maghimong island-hopping port ang merkado tungod sa kaduol niini sa sentro sa siyudad nga makadani og daghang mga turista.

Nagtuo si Pesquera nga walay panagbangi tali sa mga bangka sa pangisda (nga magdiskarga sayo sa kadlawon) ug mga bangka sa island hopping (nga mag-operate sa buntag).

Hinuon, gikinahanglang susihon og maayo ang disenyo sa fencing project.

Atol sa regular nga session sa konseho niadtong Abril 23, 2025, gikuwestiyon ni Pesquera ang pagkamahinungdanon sa fencing project.

Nipasidaan siya nga bisan makapalambo kini sa seguridad, mahimo usab kini nga makapahuot og samot sa limitado na nga luna sa merkado.

Matod ni Maria Lilibeth del Mar, pangulo sa planning division sa City Engineering Office, atol sa usa ka executive session niadtong Miyerkules, Mayo 21, 2025, nga ang proyekto gihangyo sa City Market Administrator.

Gipasabot ni Del Mar nga mahinungdanon ang fencing project sa isyu seguridad.

Iyang gitumbok ang dag­hang mga taho sa nawala nga mga butang ug kon aduna nay koral, mas ma-monitor ang mga tawo nga mosulod ug mogawas sa merkado.

Ang gisugyot nga koral magbuwag sa Pasil Fish Market gikan sa residential area ug aduna kini tulo ka gates: usa sa Gen. Gines Street ug duha sa Belgium Street.

Gipadangat na ngadto ni Konsehal Jerry Guardo, Chairperson sa Committee on Infrastructure, ang pag-approve sa resolusyon nga nagtugot kang Mayor Raymond Alvin Garcia nga mosulod sa usa ka P9,695,401.13 nga kasabutan sa konstruksyon uban sa Aloja Builders and Realty.

Aduna na kini kontrata apan wala pa’y na-isyu nga “notice to proceed.”

Atol sa executive session, gipahayag ni Pesquera ang kabalaka bahin sa gilapdon sa mga gate, nga may sukod nga unom ka metros.

Iyang gipunting nga kining gilapdon makapalisod sa mga sakyanan, hilabi na sa mga trak, sa pagmaniubra.

Nahinumdom si Pesquera sa usa ka ordinansa nga iyang giamendahan kaniadto, nga naglatid nga alang sa usa ka dalan nga unom ka metros ang gilapdon, ang usa ka gate kinahanglan nga 12 ka metros ang gilapdon.

Nagpahayag si Pesquera og kabalaka nga ang gamay nga pag-abli sa gate makapatay sa merkado.

“It should be easy ba, accessible, kay mao gyud na mamatay ang atong merkado,” pasabot ni Pesquera.

Samtang duha ka mga representante gikan sa Cebu Pasil Fish Market Association nanghinaot nga maaprubahan sa konseho nga proyekto.

“Dugay na na namo gihangyo nga isarado para naa sad mi security,” matod sa usa ka representante. / JPS