Senior citizen gikan na-rehab nasikop sa buy-bust

Tulo ka tawo nasikop sa gilusad nga anti-illegal drug operation sa Philippine Drug Enforcement Agency (PDEA)-Cebu Provincial Office sa usa ka drug den sa Sityo Ipil, Barangay Basak San Nicolas, Dakbayan sa Sugbo, ang bag-o lang gideklarar nga drug cleared alas 7:50 sa gabii, Biyernes, Mayo 23, 2025.

Si PDEA7 acting director Alex Tablate niila ni alyas Jonathan, 60, residente sa Basak San Nicolas nga maoy target sa operation ug mao usab ang nagpadagan sa drug den.

Si Jonathan nakalampos sa Community Based Drug Rehabilitation Program (CBDRP)sa barangay apan nibalik sa iyang naandan nga trabaho ug bisyo.

Lakip sa nadakpan ang duha ka lalaki nga naatlan sa sulod sa drug den nga silang alyas Jino, 39, e-bike driver ug alyas Vincent, 31, welder nga pulos residente sa maong lugar.

Nakuha gikan kanila ang pito ka pakete sa gituohang shabu nga motimbang og 15.08 grams nga dunay estimated average market value nga P102,408 ug mga drug paraphernalia.

Matod ni Leia Alcantara information officer sa PDEA7 nga usa ka semana nila nga gipaubos sa case buildup ang maong drug den human nigawas ang impormasyon nga nibalik sa iyang ilegal nga kalihukan ang suspek, una gilusad ang operation.

Giingong makabaligya si Jo­nathan og 10 ngadto sa 20 gra­mos nga shabu matag semana.

Kalapasan sa Section 5,6,7,11 ug 12, Article II Republic Act 9165 ang atubangon nga kaso sa mga suspek. / AYB