3 nga agcacabagyan a kumandidato iti 2025 elections, kaunaan a nangidatag ti COC na iti COMELEC offices ditoy La Union
Ben Madilynn
LA UNION – Tallo nga agcacabagyan iti kasapaan a nagturong iti local offices ti Commission on Elections ditoy probinsiya a La Union tapno mangidatag ti certificate of candidady (COC) para iti masungad a 2025 National and Local elections.
Ditoy siyudad ti San Fernando, kaunaan a nagturong iti City Comelec Office ni Vice-Mayor Alf Ortega, iti oras ti alas 8:00 itay bigat, tapno ipila ti kandidatura na kas pabotosan a mayor ditoy siyudad.
Kadwa na a nagturong iti nasao nga opisina ti asawa ken annak na, sumagmamano a kakadwa na a kandidato kina-konsehal ken supporters dagitoy.
Idiay ili ti San Juan, kaunaan a nagturong iti Comelec Office tapno ag-file ti COC ni incumbent Vice-Mayor Manix Ortega a pabotosan kas mayor ti nasao nga ili.
Kadwa na met a nagturong iti opisina dagiti uppat a pabotosan a konsehal a kabilang iti line-up na ken dagiti napinget a supporters dagitoy.
Simmaruno a nag-pila ti kandidatura na para kina-mayor ni Ms. Lyn Ursua, maysa a negosyante iti nabirngasan a Surfing Capital of the North.
Kabayatanna, iti Comelec Provincial Office, nasapa met a nagturong iti bunggoy ni Incumbent Governor Rafael-Ortega David tapno mangipila ti kandidatura tapno agpa-ilayon iti nasao a posisyon, para iti maisayangkat nga eleksiyon inton May 12, 2025.
Alas 8:00 itay bigat nga impila na ti COC, kadwa na ti ama na a ni sigud a Governor Pacoy Ortega, a tumaray kas Congressman ti maikadwa a distrito ti La Union.
Iti pakabuklan, nagbalin a naurnos ken nakapya iti panagipila ti COC dagiti nasao a kandidato, gaputa sinurot da iti allagaden ti Comelec iti pannakitinnulong dagiti naideploy a kameng ti Phil. National Police.
