Ben Madilynn
Isaulog sa Cebu Orthopaedic Institute (COI) ang ilang ika-26 ka mga tuig anibersaryo pinaagi sa pagpahigayon sa ikaduhang edisyon sa “2025 COI Run” karong Hunyo 15 sa Pescadores Road sa Cebu Business Park.
Ang bag-ong edisyon sa lumba pormal nga gianunsyo kagahapon sa buntag, Huwebes, Mayo 22, 2025, pinaagi sa usa ka press conference sa Casino Español de Cebu sa dalan Ranudo, Dakbayan sa Sugbo.
Ang COI nakigtambayayong sa Coco Running sa pag-organisar alang sa tinguha nga matupngan o kaha malabwan ang kalampusan sa labing unang edisyon sa lumba sa niaging tuig.
Sa niaging tuig, ang COI nagpahigayon sab og bike event apan nakadesisyon ang mga nagpasiugda nga magtutok na lang sa fun run karong tuiga.
Ning tuiga, gilakip na sa lumba ang 21K half marathon sa mga kategoriya nga kombatihan.
Ang ubang mga kategoriya mao ang 12K, 6K, ug 3K categories.
Ang COI, nga nagdalit og world-class orthopaedic care, nakadesisyon nga mopahigayon og fun run isip tipik sa ilang adbokasiya sa maayong panglawas.
“The fun run was organized as a way to commemorate this event, and at the same time promote health, physical fitness and environmental awareness, all of which are ideals that COI strives to embody,” pamahayag ni Dr. Hester Renel Lim Palma, usa ka orthopaedic surgeon sa COI.
Sa niaging tuig, ang lumba nakadani og kapin sa 1,000 ka runners.
Ning tuiga, ang mga nagpasiugda naglaum nga makadani og 1,500 ngadto sa 2,000 ka mga partisipante.
Gawas sa ganting mga salapi, ang mga partisipante aduna sab kahigayunan nga modaog sa madanihong raffle prizes nga mao ang brand-new Honda Wave motorcycle, duha ka brand-new window-type air conditioning units, water dispenser, ug uban pa.
Mahimong makaparehistro sa online sa https://cocorunning.myruntime.com/register/cebu-orthopaedic-institute-run-2025 ug puwede sab sa RUNNR sa Ayala Center Cebu sa mga adlaw nga Biyernes, Sabado ug Dominggo. / ESL
Source: 2025 COI Run ipahigayon karong Hunyo 15
