Gwen Garcia ‘gisabotahi’ aron mobiya

Kampo ni outgoing Cebu Governor Gwendolyn Garcia nagduda nga gisabotahi ang tinguha nga mapadali ang pagkanaog niya sa Kapitolyo sa dili pa hingpit matapos ang iyang termino sa Hunyo 30, 2025, pinaagi sa wala ug tuo nga mga kaso o reklamo nga gisang-at batok kaniya. 

Ang maong pasangil nitumaw human sa gisang-at nga laing kaso nga administratiba ug kriminal ngadto sa buhatan sa  Ombudsman.

Nahinumdoman nga niadtong Abril 23, ang Ombudsman niluwat og suspension order batok kang Garcia tungod sa laing reklamo. 

Atol sa press briefing sa Cebu Provincial Capitol niadtong  Miyerkules, Mayo 21, 2025, gidetalye ni Garcia ug sa iyang mga abogado ang bag-ong reklamo gikan sa usa ka Michelle R. Osmeña. 

Gisang-at ni Osmeña ang kasong administratiba ug kriminal batok kang Garcia niadtong Oktubre 22, 2024, sa Ombudsman tungod sa pasangil nga “grave abuse of authority, grave misconduct, ug conduct prejudicial to the best interest of the service.”

Si Atty. Mae Elaine Bathan, usa sa mga legal consultant sa Kapitolyo, niklaro nga ang ikaduhang reklamo direkta nga gisang-at sa opisina sa Ombudsman sa Metro Manila ug ang sulod niini konektado sa Cebu Bus Rapid Transit (CBRT) project.

Gikonekta kini ni Bathan sa nangaging reklamo nga gisang-at ni kanhi Mayor Michael Rama batok sa gobernador niadtong Marso 18, 2024, sa Office of the President (OP). 

Ang reklamo ni Rama nabahin sa “cease-and-desist order” ni Garcia sa pagpatuman sa CBRT.

Natingala si Bathan sa dungan sa pagsumite sa reklamo niadtong Oktubre 22, 2024, sa desisyon sa OP nga nag-dismiss sa reklamo ni Rama tungod sa kakuwang sa “prima facie” nga ebidensya, usa ka desisyon nga gipirmahan ni Executive Secretary Lucas Bersamin.

Giabsuwelto sa OP ang gobernador ug gi-dismiss ang maong kaso, samtang nipalag si Bathan nga unta gi-dismiss na sa Ombudsman “motu proprio” (sa kaugalingon lang nga inisyatiba).

Hinuon, matod niya, ang Ombudsman nilihok lang niini niadtong Mayo 15, 2025, dihang gipangayuan si Garcia sa pagsumite sa iyang counter-affidavit.

Dugang pa, na-docket kini pito ka buwan human masang-at.

KATINGAD-AN

Gibutyag ni Bathan ang ubay-ubay nga “makatugaw nga mga kamatuoran” bahin sa reklamo.

Matod niya nga nawala ang kompleto nga address sa nagreklamo sa Barangay Guadalupe, ug ang gihatag nga mga ID, lakip ang Postal ID ug Driver’s License, giingong “fictitious ug fabricated.” 

Sa pag-verify, ang ID number dili motugma sa database sa Land Transportation Office.

Nakita sab ni Bathan ang mga kalainan sa ngalan ug roll number sa notary public, ug bisan sa abogado nga si John Edward T. Ang nga nagnotaryo sa reklamo.

Si Atty. Rory Jon Sepulveda, laing legal consultant sa Kapitolyo, niingon nga ang sunod-sunod nga panghitabo gi-orchestrate, ilabi na kay ang kabalaka sa CBRT natubag na sa OP.

Matod niya, ang kabalaka mao nga ang giingong “orchestrated move” moresulta sa paghikaw kang Garcia sa iyang bug-os nga termino.

Gipadayon niya nga ang kaso kinahanglan nga “moot” na, tungod kay ang OP, isip ang nagdisiplina nga awtoridad, nakaila na sa maong butang.

Si Atty. Ben Cabrido, laing Legal Consultant sa Kapitolyo niingon nga ang mga tawo nga nagpaluyo niining gi-orchestrate nga kaso kinahanglan nga “magpaabot og counter-charges,” nga nagpasiugda nga ang sitwasyon “questionable kaayo” tungod kay ang mga reklamo gisang-at sa Ombudsman sa Metro Manila ug dili sa iyang Visayas Office sa Dakbayan sa Sugbo.

Gikonekta sab ni Garcia ang ikaduhang reklamo sa administratibong reklamo nga gisang-at sa usa ka Moises Garcia Deiparine. 

Kini bahin sa iyang pagluwat og special permit sa giingong “quarrying activity” sa giprotektahan nga lote. 

Hinuon, giklaro ni Garcia nga usa kini ka “desilting activity” sa Mananga River sa Talisay City aron makuha ang tubig ug isuplay sa Metropolitan Cebu Water District tungod sa grabeng hulaw.

Gipunting ni Garcia ang paspas nga paglihok sa Ombudsman. 

Ang reklamo nga gipamatud-an niadtong Abril 21 sa Dakbayan sa Sugbo, gisang-at sa Ombudsman sa samang adlaw.

Dugang pa niya nga gikumpirmar ni Deiparine sa usa ka balita nga gisang-at kini niadtong Abril 19, atol sa Black Saturday.

Gipunting pa niya nga ang reklamo gipamatud-an atubangan ni Atty. Flornelio Ediza sa Dakbayan sa Sugbo niadtong Abril 21, dayon gisang-at sa Ombudsman sa Metro Manila sa samang adlaw. 

Ang suspension order gipirmahan ni Ombudsman Samuel Martires duha lang ka adlaw pagkahuman, niadtong Abril 23.

GUINNESS

Gitawag kini ni Garcia nga “Guinness Book of a World record for fastest case resolution.”

Gikumpirmar ni Garcia nga ang iyang grupo daling niadto sa Court of Appeals (CA) nga niluwat og 60 ka adlaw nga Temporary Restraining Order (TRO). 

Kini nga TRO epektibong nagprotekta kaniya hangtod sa katapusan sa iyang termino.

Matod ni Sepulveda nga ang unang kaso karon “patay na.”

Gisugyot sab ni Garcia ang motibo sa mga pagsulay sa pagpalagpot kaniya. 

Gihisgutan niya ang usa ka “cease and desist order” nga giisyu sa Apo Land and Quarry Corporation (ALQC) alang sa laing 30 ka adlaw niadtong Marso 25, nga natapos niadtong Abril 24.

Siya nagduda nga adunay gusto nga mopalagpot niya aron malikayan sa pag-isyu og bag-ong “cease and desist order.”

Ang ALQC ang nag-unang supplier sa mga hilaw nga materyales alang sa Apo Cement Corporation, gimanduan nga hunongon dayon ang tanang “earth-moving activities,” likayan ang bisan unsang aksiyon nga makapabalik sa gidili nga operasyon, ug motuman sa tanang gikinahanglang mando hangtod makumpleto ang audit ug assessment. / EHP