Sumagmamano a pamilia iti ili ti Bacarra, napupok iti layos gapu iti iduduprak ti Bagyo Julian
abyasa
LAOAG CITY – Naka-isolated wenno napupok iti layos dagiti sumagmamano a pamilia iti Sitio Taguiporo Brgy. 37 Casilian iti ili ti Bacarra gapu iti iduduprak ti Bagyo Julian ditoy probinsia.
Segun ken ni Mr. Bryan Garcia, residente iti nasao a lugar, saandan a nakaruar pay iti pagtaenganda gapu ta parbangon pay laeng ket nakastreken ti danom kadagiti balayda.
Inbatadna a madanagan isuda gapu ta nadadael iti sango a paset ti dike wenno ti slope protection ti Bislak River nga isu ti agserserbi a mangprotekta kadakuada.
Kunana a basar iti obserbasionda ket marigatan dagiti rescuer a mapan agresponde kadakuada gapu iti kinangato ti lebel ti danom.
Mainaig iti daytoy, inpakaammo ni Mr. Garcia a naka-standby met dagiti opisial ti barangay a tumulong kadakuada.
Innayonna a no bilang dumakkel pay ti danom ket kaadduan kadakuada ket mapilitan a mapan iti tuktok iti galbada tapno maliklikan laeng a malayosda.
