Pasigarbo, Suroy-Suroy Sugbo dili na ipadayon ni Baricuatro

Gipahibalo ni Governor- elect Pamela Baricuatro nga wala nay Pasigarbo sa Sugbo ug Suroy-Suroy Sugbo tungod sa kalisod sa pinansyal ug logistics.

Ang duha maoy flagship tourism program ni outgoing Governor Gwendolyn Garcia.

Atol sa news forum sa Mayo 20, 2025, si Baricuatro nagkanayon nga imbes Suroy-Suroy, mga mobile clinic ug mobile kitchen ang ipadala sa mga layong lugar sa probinsiya aron mohatag og libre nga healthcare services ug pagkaon sa mga Sugbuanon.

“If naa man gani magsuroy-suroy sa probinsiya, it won’t be me. Kana atoang mobile clinics ug atong mga mobile kitchen nga mopakaon sa katawhan,” matod sa bag-ong gobernador.

Matod niya nga ang kagamhanan sa Lalawigan sa Sugbo mogasto og dili momenos P255 milyunes sa pagpahiga­yon sa Pasigarbo.

“Gasto kaayo ning Pasigarbo. Imagine, 255 million pesos,” ingon ni Baricuatro.

“How can they compete in terms of budget? Logistically, it’s improbable,” matod niya nga nitumbok sa mga third class municipalities nga makigkompetinsya sa mga first class municipalities ug component cities.

Iyang gidugang nga dunay mga report nga may mga participant nga mangasamad samtang nagbiyahe pa­ingon sa Cebu City alang sa Pasigarbo.

“Daghan kaayo ang mga nadisgrasya. Kana gyud, dili gyud na nako ipadayon. I have been vocal about it from the start,” matod ni Baricuatro.

Iyang gidugang nga ang Sugbo angayan nga mo-focus sa Sinulog Festival nga maoy labing dako nga kapistahan ug mangita siya og laing paagi aron padayong mapalambo ang local talents ug kultura sa tungatungang bahin sa tuig.

“I think there has to be one festivity in Cebu Island, that’s Sinulog,” matod niya.

Niadtong Nobiyembre 5, 2024, unang gipadayag ni Baricuatro ang pagpahunong sa Pasigarbo ug Suroy-Suroy kon mapili ug nisaad nga ang pundo nga alang unta niini iyang ibutang alang sa healthcare, poverty reduction, ug sa mga nag-unang serbisyo.

Ang Pasigarbo sa Sugbo usa ka kompetisyon nga magpasundayag sa mga festival sa local government units ubos sa Lalawigan sa Sugbo nga gisugdan niadtong 2008.

Kini ipahigayon matag buwan sa Agusto nunot sa founding anniversary sa lalawigan.

Duna say gilusad nga tourism initiative niadtong 2004, ang Suroy Suroy sa Sugbo nga magpasundayag sa Kalungsoran sa Sugbo pinaagi sa travel packages.

Agi og tubag, 49 ka mga mayor , Cebu Tourism Officers Association ug Cebu Choreographers Association (CCA) nisukwahi sa pamahayag ni Baricuatro ug nitataw nga ang Pasigarbo sa Sugbo usa ka economic catalyst.

Sila pulos nagkauyon nga ang programa naghatag og panginabuhi sa mga choreographer, dance masters, costume designers ug makers, visual artists, film­makers, carpenters, ug uban pa. / EHP