Daan nga IDs sa seniors balido pa

GIPASALIG sa Office of Senior Citizens Affairs (Osca) ngadto sa mga senior citizens nga ang Senior IDs nga giisyu sa 2022 pabilin pang balido alang sa pagdawat og mga subsidiya.

Gisulti ni Osca Head Lorenzo Borja ngadto sa City Information Office nga bisan og gidasig ang mga seniors nga magpabag-o sa ilang mga IDs, kadtong wala pa makahimo niini, padayon nga makadawat pa og tabang pinansiyal karong tuiga.

Apan iyang giklaro nga tanang mga senior citizens makabaton og balido nga Osca ID aron nga mokuwalipikar alang sa tinuig nga subsidiya. Ang gitakdang petsa alang sa subsidy registration karong tuiga sa Mayo 31, nagpasabot nga mga indibiduwal kinsa mag-edad na og 60 sa Hunyo 2025 mahimo lang makadawat sa ilang subsidiya sa 2026.

Alang sa pagpasayon sa ID updates, ang Osca teams aktibong nakig-koordinar uban sa mga barangays, People’s Organizations, ug sa City Social Welfare and Development Office (CSWDO) aron nga maabot ang mga seniors nga indibiduwal kinsa naglisud sa pag-adto sa ilang buhatan.

Sayo niini, si CSWDO Head Julie Dayaday nagsulti nga ang pag–update sa IDs kabahin sa paningkamot aron nga mahiusa ang senior citizen master list sa dakbayan, kay ang managlahi nga listahan sa nagkadaiyang mga ahensiya sayo niini niresulta sa disrepansiya sa datus.

Tug-an niya nga kasamtangan sila nga nag-update sa ilang mga rekord tungod kay ang kanhi sistema kuwang og paghiusa, data-based approach.

“Kay to’ng una, kung kinsa tong myembro sa association among i-masterlist, medyo nakita namo nga dili unified ang data. Updating kasi si Osca karon sa ilahang data kay naa pa man gyuy karaan kaayo unya wala pa man ta naka data-based atong unang panahona,” pagpasabot niya. (CIO-Davao)