Siudad idiay China, nakagun-od ti Guinness records gapu iti rinibu a drones a pinatayab para iti drone art show
abyasa
LAOAG CITY – Nakagun-od ti world record ti maysa a Chinese city gapu iti rinibu a drones nga inusarda para iti maysa a drone art show.
Kinumpirmaran ti Guinness World Records a ti Yanbian Korean Autonomous Prefecture ti baro a record holder ti titulo a “largest aerial image formed by multirotors/drones.”
Daytoy ket kalpasan a nakapatayabda ti 7,598 drones a nang-project kadagiti nagduduma nga imahe iti tangatang.
Naiyuswat ti drone art show para iti maika-72 nga anibersario ti Yanbian Korean Autonomous Prefecture.
Ti Yanbian ket maysa a rehion iti amianan a daya iti paset ti China, iti probinsia ti Jilin no sadinno a mabigbigbig daytoy gapu iti kinaadu ti populasion a bukbuklen ti etniko a Koreano.
Naammoan a dagiti sumagmamano nga imahe a nabukel dagiti drones ket ti Great Wall of China, Dragon, Tiger ken ti official flower ti Yanbian, ti Azalea.
