Gun ban magpadayon

Gipahinumdoman sa Police Regional Office (PRO) 7 ang publiko, lakip na ang mga gun holders community nga nagpadayon pa sila sa pagpatuman sa Comelec gun ban sanglit matapos man ang election period hangtod sa tungang gabii sa Hunyo 11, 2025.

Nagsugod nga gipatuman sa PNP ang gun ban niadtong Enero 12, 2025, diin gidid-an kadtong mga lisensyado nga gun holder nga makadala sa ilang mga armas ug mahait nga hinagiban sa gawas sa ilang balay tungod kay gisuspenso man ang permit to carry firearms outside residence.

Lakip sa gidid-an ang pagtiner og bodyguards o kaha security personnel kon walay saktong accreditation gikan sa Commission on Elections (Comelec).

Si PRO 7 Director Police Brigadier General Redrico Maranan nikumpirmar nga magpadayon ang law enforcement operation sa Comelec gun ban tibuok rehiyon 7 subay sa pagseguro nga magpadayon ang pagsunod sa election related restrictions.

“While the voting has ended, the election period is still in effect. The Comelec gun ban remains in force until June 11, and our law enforcement efforts will continue to maintain post-election peace and security,” matod ni Maranan.

“We urge the public to remain vigilant and cooperative. Let us preserve the peace we have achieved during the elections and continue to protect our communities from gun-related violence.” dugang niya.

Gikan sa Enero 12, 2025, ang PRO 7 nakatala og 397 ka gun ban violations nga niresulta sa pagkasikop sa 407 ka mga tawo ug pagkasakmit sa 424 ka lainlaing kalibre sa armas sama sa 407 ka gagmay nga armas, tulo ka light weapons, tulo ka replica kon improvised nga armas, tulo ka explosives ug 1,206 ka round sa bala.

Kini maoy resulta sa gipakusgan nga Comelec checkpoints, police response, police patrols ug anti-illegal drug operations. Giawhag ang publiko sa PRO 7 nga i-report kon dunay makita nga nagdaladala og armas o mga kadudahan nga lihok sa ilang tagsa-tagsa ka dapit. / AYB