Last day of registration ita nga aldaw (Sept. 30) para iti 2025 Midterm Elections – COMELEC
Ben Madilynn
LA UNION – Impalagip ti Commission on Elections iti publiko a kumamat nga agparehistro iti local offices ti komisyon agsipudta ita nga aldaw nga agleppas iti registration period para iti 2025 Midterm Elections.
Ita nga aldaw, Setyembre a-30 ket agleppasen ti registration a rinugyan ti komisyon idi Pebrero 2024.
Segun kenni Comelec spokesperson Atty. Rex Laudiangco, amin a klase ti serbisyo wenno aplikasyon seknan iti umadanin a 2025 elections ket silulukat, a pakaibilangan ti registration, panagakar ti presinto a pagbotosan ken re-activation.
Karaman pay iti panag-sukat ti nagan nu naki-sawan, panagsukat ti status manipud panagbalin nga OFW agturong iti local voter, ken dadduma pay.
Kadagiti Pinoy workers a nakatuding nga agturong iti sabali a pagilian tapno agtrabaho sakbay iti May 2025 Elections, imbaga ni Laudiangco a mabalin da ti agparehistro kadagiti opisina ti Philippine Overseas Employment Administration (POEA).
Adda pay kunana ti intuding a registration site ti komisyon.
Para met kadagiti Pinoy workers nga adda iti sabali a pagilian ken kayat da ti agbotos iti sumaruno nga eleksiyon, mabalin da ti agparehistro iti amin a konsulada ken embahada ti pagilian.
