Ben Madilynn
Sa ikaduhang sunodsunod nga tuig, gideklarar na usab ang Station Advisory Group for Police Transformation and Development (SAGPTD) sa Inayawan Police Station 7 (PS7) isip Most Outstanding Advisory Group sa Cebu City Police Office (CCPO) karong tuiga.
Kini atol sa gipahigayon nga 8th CCPO Advisory Group Summit niadtong Septiyembre 21, 2024 sa Marco Polo Plaza.
Nalangkat ang maong pasidungog gumikan sa mga programa ug kalihokan nga gipasiugdahan sa SAGPTD sa PS7 pinangulohan ni Hon. Rowela Rosal isip kaabag sa kapulisan aron mamintinar ang kahusay ug kalinaw sa mga lugar nga sakop sa areas of responsibility niini.
Ang SAGPTD gilangkuban sa mga representante sa lainlaing mga sektor sama sa gikan sa academe, religious, business, senior citizens, government, media ug uban pa.
Sa summit, gipresentar usab sa lainlaing mga SAGPTD ang tagsatagsa ka accomplishments ug contributions sa komunidad gikan sa Stations 1 hangtod 11, apil ang sa Cebu City Mobile Force Company.
Ang laing mga nakadaog sa Outstanding Advisory Group mao ang SAGPTD gikan sa San Nicolas Police Station 6 isip 1st runner-up ug ang advisory group sa Talamban Police Station 8 isip 2nd runner-up.
Sa nasayran, niadtong 2023, ang SAGPTD sa Police Station 7 usab ang gideklarar nga Most Outstanding Advisory Group sa CCPO.
Gawas niining pasidungog, nalangkat usab sa SAGPTD SA PS7 ang Best in Talent ubos sa Group Category 2024.
Samtang, gipasidunggan usab isip Best Police Strategy Management Unit, Police Non-Commissioned Officer (PSMU, PNCO) 2024 si PSSg Maricar V. Englis sa Guadalupe Police Station 9, 1st runner-up si PCpl Jessa B. Lipar sa Inayawan Police Station 7 ug 2nd runner-up si PMSg Johnrell C. Romero sa Talamban Police Station 8.
Sa samang kalihokan, nanumpa usab og balik ang daang mga miyembro sa lainlaing advisory groups sa mga estasyonan nga sakop sa CCPO ingon man ang bag-ong mga sakop.
Ang summit gipangulohan ni Marlinda Angbetic Tan, chairperson sa City Advisory Group for Police Transformation and Development (CAGPTD), uban si CCPO Acting City Director PCoL Antonietto Cañete, Cebu City Councilor Joel Garganera, ug ubang opisyal sa CCPO. / PR
