Publiko gipasidan-an pagsul-ob og helmet

SUBLING nagpahimangno ang awtoridad sa Davao City labot sa makanunayon gayud nga pagsul-ob og helmet atol sa pagmaneho og motorsiklo.

Kini human nga gikompirma sa Department of Health (DOH) nga 93 porsiyento sa mga na-report nga mga road traffic injuries karong tuiga gikan sa mga motorcycle ug bicycle riders nga wala nagsul-ob og helmet.

Tuig 2006, gipatuman na sa Davao City ang Helmet Ordinance diin “No Helmet, No Travel” policy nga sa kasamtangan padayong ginasunod sa mga Dabawenyo nga motorista.

Subay sa Republic Act (R.A) 10054 kun Motorcycle Helmet Act of 2009, obligadong magsul-ob og standard protective helmet ang tanang motorcycle drivers ug back riders aron malikayan ang grabe nga impak ilabi na sa ulo nga bahin kon maaksidente man ugaling.

Subay niini, mamahimong silotan ang mga molapas diin sa first offense, adunay multa nga P1,500, second Offense, P3,000, third offense, P5,000 ang multa ug alang sa 4th Offense ug mosunod, P10,000 ug kompiskahon sab ang lisensiya.

Gani gipasabot ug gidasig sa ahensiya ang publiko nga magsul-ob og DTI-approved helmet bisan asa ug bisan kanus-a aron nga malikay sa grabeng disgrasiya. (Jeepy P. Compio, dxDC RMN Davao)