Opisyal nanawagan nga dynamite fishing undangon

Ang pangulo sa Department of Veterinary Medicine and Fisheries (DVMF) nga si Dr. Alice Utlang niingon sa usa ka chat interbiyu niadtong Do­minggo, Mayo 18, nga iyang panawagan sa publiko nga undangon ang paggamit og pabuto sama sa dinamita sa pagpanagat og isda aron dili madaut ang kalikopan alang sa kaayohan sa umaabot nga mga henerasyon.

Kini nunot sa pagkompiska sa siyam ka styrofoam box nga isda nga giingon’g pinabuthan atol sa gipahigayon nga operasyon sa may dalan C. Padilla, Dakbayan sa Sugbo, niadtong Miyerkules sa gabii, Mayo 15, 2025.

Ang operasyon gipangunahan sa Bureau of Fisheries and Aquatic Resources (BFAR) pinaagi ni team leader Alfie Pahamutang, inabagan sa Department of Veterinary Medicine and Fisheries (DVMF) nga gipangulohan ni Em-em Cati­pay, Cebu City Police Office (CCPO), ug Cebu City Transportation Office (CCTO).

Ang nakompiskang mga isda gi­bana-banang mobalor sa P72 mil.

“Dapat gyud undangon gyud na nila (dynamite fishing) kay kung ila na ning sige buhaton, moabot ang panahon nga lisud na’g panguha kon mahurot ang mga isda kay maguba ang itlogan ug maapil sad og kamatay ang mga gagmay’ng isda,” matod ni Utlang.

Siya midugang nga bisan ang mga corals madaut usab.

Siya nanghinaut nga ang mga tawo magbuhat og mga butang dili lang para sa ilang kaugalingon kondili alang usab sa umaabot nga henerasyon.

Si Ramil Ayuman, pangulo sa Cebu City Disaster Risk Reduction and Management Council, nag-post sa social media nga ang mga isda nga gidudaha’ng nakuha pinaagi sa dynamite fishing nakumpiska tungod sa mga kalapasan sama sa illegal fishing ug misdeclaration of commodity.

Ang mga responsable sa pagpalusot sa isda mag-atubang og multa nga katumbas sa lima ka pilo sa balor sa isda kon 360,000.

Sanglit una pa man kini nga kalapasan, ang mga mipalusot hatagan og 30 porsyento nga discount sa ilang multa, nga nagkantidad og P252,000. / CDF