Traysikol gidumbol sa motor, nalimbuwad

Nalimbuwad ang traysikol nga tangkal-tangkal human kini gidumbol sa usa ka motorsiklo nga miresulta sa pagkaangol sa isig ka drayber niini pasado alas 4 sa kadlawon sa Sabado, Mayo 17, 2025, sa may Barangay Basak Pardo, Dakbayan sa Sugbo.

Nailhan ang drayber sa traysikol nga si Eddie Duwero, 69, nagpuyo sa Barangay Bulacao, samtang ang nagmotorsiklo nailhan lang sa alyas nga John, hingkod ang pangedaron.

Base sa imbestigasyon sa Traffic Enforcement Unit (TEU) sa Cebu City Police Office, ang duha ka mga drayber pareho og direksyon padulong sa amihanang bahin sa dakbayan.

Giingong nagsunod ang motorsiklo dihang nabundolan ang traysikol.

Si Duwero nibutyag nga padung unta siya sa Pasil aron magkarga og isda apan pag-abot sa nahisgutang dapit kalit lang gidumbol sa luyo nga bahin sa iyang trasikol ang maong motorsiklo nga gituohang kusog ang padagan hinungdan nga nawara-wara ang manobela nga miresulta sa iyang pagkatuwad.

Matod niya nga maayo na lang kay wala siya mapiit sa traysikol og nakagawas ra siya dayun.

Nidugang si Duwero nga sa sulod kapin tulo ka dekada niya nga pag-drive og traysikol nga mao ang iyang panginabuhian, kini ang unang higayon nga nakasugat siya og disgrasya.

Samtang sa habig sa drayber sa motorsiklo, midepensa kini nga wala kaayo siya kaklaro sa maong traysikol sanglit wala kini suga sa luyo nga bahin ug hinay ra ang iyang dagan.

Daling gidala sa tambalanan ang drayber sa motorsiklo nga nakaangkon og daghang bun-og ug samad sanglit nalagpot man kini samtang si Eddie nagdumili nalang sa pagpatambal kay abaga ra ang sakit niya.

Sa kasamtangan, nagpadayon pa ang negosasyon tali sa duha ka habig, samtang ang mga motor gidala sa TEU. / JDG