Gov. Manotoc, kalikagumna a saan koma a mapulpulitika ti Tan-ok Festival

LAOAG CITY – Kalikagum ni Gov. Matthew Marcos Manotoc a saan koma a mapulpulitika ti pannakaisayangkat ti Tan-ok Festival ditoy probinsia.

Daytoy ket kalpasan nga awan ti dance performers a makipaset iti naindaklan nga aktibidad manipud ditoy siudad ti Laoag.

Nupay kasta, inpasingked ni Manotoc a ti napateg ket agragsak ti kaadduan a makidanggay iti nasao nga aktibidad.

Mainaig iti daytoy, inrakurak ni Mr. Ianree Raquel, Provincial Tourism Officer nga awan pay ti naawatda a pormal a surat manipud iti City  Tourism Office ditoy siudad ti Laoag maipanggep iti saan a pannakipaset ti lokal a gobierno ditoy siudad iti Tan-ok Festival.

Inlawlawagna nga inpabus-oyda kadagiti maseknan a lokal a gobierno iti intero a probinsia ti wagas no kasanoda nga iprisentar ti bukudda a kultura.

Kunana nga ikonsiderarda ita a tawen ti pannakainayon ti bilang dagiti performers ken performance iti Tan-ok stage.

Innayonna a manarimaan ti pannakaiplastar ti criteria for judging ken dagiti maipaay a premio kadagiti agballigi iti kompetision.

Kabayatanna, maiyuswat ti Tan-ok Festival inton Enero 15 a pagbibinnalubalan dagiti nagduduma nga ili ken siudad ditoy probinsia.