Maikadua a puesto iti CARAA Meet 2025, tarigagay a magun-od iti delegasyon iti Benguet malaksid pay iti kampeonato
Ben Madilynn
Tarigagay ti delegasyon iti Probinsya ti Benguet a magun-od ti kampeonato wenno uray ti maikadua a pwesto iti 2025 Cordillera Administrative Region Athletic Association (CARAA) Meet.
Iti panakiuman ti Bombo Radyo kenni Ceasar Luma-ang, Provincial Sports Officer iti Department of Education (DepEd)-Cordillera, kinunana a saan a mailibak a ti delegasyon iti Baguio City ti maysa kadagiti kapigsaan gapu ta kanayon nga agkampeon daytoy iti nasao a pasalip.
Gapu iti dayta,kadawyan a ti laengin maikadua a kangatwan a puesto ti paglalabanan dagiti daduma pay a delegasyon.
Maibasar iti agdama a datos ti Provincial Sports Officer, dumanon iti 900 nga atleta ti mangbukel iti delegasyon iti Benguet; 700 iti Mt. Province; 650 iti Ifugao; 595 iti Kalinga; 736 iti Apayao; 595 iti Abra; 550 iti Tabuk City ken agarup 800 met dagiti mangibagi iti siudad ti Baguio.
Para ita a tawen, dumanon iti Php3 million ti inlatang iti Benguet Special Education Fund nga aramaten dagiti delegasyon bayat a P15 million ti nailatang para iti panangsangaili ti probinsya ti Benguet iti nadakamat nga sports event.
Maipalagip nga iti Probinsya ti Apayao ti nakaangayan ti 2024 CARAA Meet nu sadino, nakaiyawid ti Benguet iti 230 a medalya a buklen ti 50 gold, 91 silver, ken 89 bronze.
Nasurok maysa a dekada metten idi naudi a sinangaili wenno inhost iti Benguet ti CARAA gapu iti panakatarimaan ken konstruksyon kadagiti nagduduma nga sport venues.
Iti sabali a bangir, nagyaman ni Luma-ang kadagiti amin a sumupsuporta iti panaghost iti nasao a probinsya iti CARAA Meet kas kadagiti stakeholders, Parent Teacher Association,residente ken daduma pay.//Bombo Mera Pacpacan
