Ben Madilynn
Na-alibwag ang mga sugarol sa sabong sa kaka sa Doña Maria 1, Barangay Punta Princesa, Cebu City human gironda sa mga sakop sa Labangon Police Station alas 9:05 sa gabii, Martes, Septiyembre 24, 2024 nga miresulta sa pagkasikop sa upat ka tawo samtang adunay usa nakaikyas.
Ang mga nangadakpan mao sila si: John Kent Antoque Teogangco, 41, residente sa Poblacion, Sibonga; Kirby Catulong Da-al, 24, taga B. Rodriguez, Barangay Sambag 2; Larever Morastill Cabahug, 53 ug Leomar Pancho Padigos, 31, nga pulos taga Doña Maria 1, Barangay Punta Princesa samtang ang nakaikyas giila nga si Jovie Estaniel.
Nasakmit sa mga operatiba sa pagpangulo ni Police Lieutenant Raymart Callao Rabanes, deputy chief sa Labangon Police Station ang usa ka improvised spider ring nga dunay pisi ug unom ka gagmayng kahon nga adunay sulod nga unom ka buhing damang o kaka lakip na ang P2,900 nga kwarta sa sugal.
Matod ni Police Major Eraño Regidor, hepe sa Labangon Police Station nga nakadawat og tawag nga nagpahibawo sa kasaba sa mga tawo nga nagsugal pinaagi sa sabong sa kaka nga nakatugaw na sa mga residente sa dapit.
Sa dihang girespondehan ug ilang naabtan ang maong mga suspetsado nga naglumba na unta sa pagpanagan apan nagunitan sila sa mga nakasibilyan nga mga polis.
“Daghan tawag sa mga silingan kay saba unya daghan na pud bata mutan-aw, mao ato gi-aksyonan. Mao naman gud poy nauso karon pero ang problema kay gihimo na mang sugal,” nagkanayon si Police Major Regidor.
Dugang ni Regidor nga makadaghan na sila makadawat og reklamo sa mga molopyo sa lugar tungod kay apil na ang mga bata nga magsugal na sab.
Gani ang tawag sa telepono nga dul-an sa 50 na ka mga tawo ang nagsugal niadtong Martes apan sa pag-abot sa mga polis naglumba ni og panagan palayo sa lugar.
Kalapasan sa Presidential Decree 1602 ang ipasaka sa Labangon police batok sa mga suspek. Sa sayo pa, niadtong Septiyembre 23 sa Sityo Lawis, Barangay Lorega San Miguel adunay 42 ka sugarol sa kaka ang nadakpan. / AYB
